Shillong, Nailur 14
Ka ïingbishar u Additional Sessions Judge ha ka Sngi Palei ka la ai hukum ban bteng ïa ka jingai jamin lypa ïa ki san ngut ki dkhot ka Hynñiewtrep Integrated Territorial Organization (HITO) ha kaba ïadei bad ka jingjia ha ka 4 tarik Nailur, hynrei ka la buh ruh ïa ki kyndon pyrshah ïa kine ki san ngut.
Lah ban kdew ba ha ka 6 tarik Nailur, katei kajuh ka ïingbishar ka la ai jamin lypa (Anticipatory Bail) ïa ki san ngut ki dkhot ka HITO ha kaba ïadei bad ka jingïakynad bad ki pulit ha ka 4 tarik Nailur hajan ka shlem treikam ka Deputy Commissioner, East Khasi Hills.
Kine kiba la ïoh jamin lypa na ka ïingbishar u Additional Sessions Judge, Shillong, ki long u President ka HITO, u Bah Donbok Dkhar lem bad ki saw ngut – Wanbun N. Dkhar, Shaniah S. Nongrum, James Lyngdoh Nongpyiur bad u Gary S. Myrboh.
Ka jingïoh jamin lypa kitei ki san ngut ka long halor ka jingujor ba la ai ha thanat Sadar (No. 236(9)23) hapoh ki kyndon 147/148/188/53/54/323A/354/323/24/332/07/120B/4 IPC ryngkat ki kyndon 6(1)(2)/7(1)(2) jong ka MMPO Act.
Haba ai ïa ka hukum, ka ïingbishar ka la ong ba la peit bniah ïa ka ‘Case Dairy’ halor katei ka jingujor bad la shem ba kam don kano kano ban pyni ba kitei ki san ngut kin phet rieh lane kin mushlia bad ki sabut lane yn donkam ïa ki ban tohkit ha along ki pulit. Nalorkata, la ong ba u pulit uba tohkit ïa katei ka jingjia ha ka 4 tarik Nailur, u khlem pyni ha ka ‘Case Dairy’ mynno kitei ki san ngut ki la wan mih hakhmat jong u ban ai jingthoh bad ïa ki jingtip kiba bun ym shym la pyndap ha kane ka ‘Case Dairy’. Namarkata, ka ïingbishar ka la kdew ba kam i donkam ba kitei ki san ngut kin shah tohkit ha along ki pulit.
“Haba la peit bniah nadong shadong, ka jingai jamin lypa lyngba ka hukum ha ka 6 tarik Nailur, 2023 da kane ka ïingbishar kan bteng haduh ban da kut ka jingbishar lane haduh ban da ai pat da kawei ka hukum,” la ong ka ïingbishar.
Ha kajuh ka por, ka ïingbishar ka la bthah ïa kitei ki san ngut ba kin leit mih hakhmat ka kynhun tohkit ha kano-kano ka por long trei bad kim dei ruh ban donkti ha kiba kum kitei kijuh ki jingshah kynnoh. La ai jinglaitluid ruh ïa kitei ki san ngut ban ai ïa ki ‘bail bond’ sha ka ïingbishar namar u pulit ba tohkit u khlem bthah ïa ki san ngut ba ki dei ban ai ïa kine ki ‘bail bond’.
La kdew ruh ba ha ka por ba la bishar ïa ka jingpan jamin lypa kitei ki san ngut, u pulit uba tohkit ïa katei ka jingjia u la kdew ba kitei ki san ngut ki la wan mih hakhmat jong u bad ki la ai ruh ïa ka jingbatai jong ki ha thanat. Une u pulit u la ong ruh ba u khlem kem satia ïa ki namar ki khlem wanrah lang bad ki nongbah jamin ha ka por ba ki la wan sha thanat.
Haduh 10 ngut ki dkhot ka HITO ki la shah kem ha ka Lah Sngi U Blei hadien ba ka la mih ka jingïakynad bad ki pulit hakhmat ka shlem treikam ka Deputy Commissioner ha kane ka nongbah. Ka jingïakynad ka la sdang hadien ba ki dkhot ka HITO ki la thmu ban leit tur sha Secretariat katba ki pulit ki la pakhang lynti.
Ka la don ruh ka jingshah sympat lathi, jingsiat ïa ka lyer pynsat khmat bad jingkawang maw ha katei ka sngi.
Ka huri hura ka la sdang hadien ba ki dkhot ka HITO ki la wanphai na thanat Sadar. Ha katei ka sngi, ki nongïalam ka HITO ki la shah khot hajir ha ki pulit ka thanat Sadar halor ka jingpyndonkam jong ki ïa ka riam sopti ïong ha ki jaka paidbah.
