Shillong, Nailur:
U Myntri Rangbah ka Jylla, Conrad K Sangma u la ong ba ka sorkar ka don ïa ka jingangnud ban pynlong ïa ka jylla Meghalaya kum ka nongbah kaba lah ban pynmih ïa ki waiñ soh ne ‘fruit wine’ jong ka ri India.
U Myntri Rangbah u la pynpaw ïa kane haba ai jingkren ha ka Sngi Palei haba u wan plie paidbah ïa ka North East Fruit Wine Incubation Centre, ha IHM Campus, Mawdiangdiang, kaba nyngkong eh hapoh ka thaiñ shatei lam-mihngi; ka jaka ban ïarap ïa ki nongseng kam ba kin pynwandur bha ïa ki kam ba ki seng.
Ha kane ka sngi, ïa u Myntri Rangbah la synran lang da ka Myntri ka tnat ka rep ka riang ka Kong Ampareen Lyngdoh lem bad u Myntri ka tnat Excise Bah Kyrmen Shylla, u MLA ka Mawryngkneng u Bah H Kharpran, ki ophisar lem bad kiwei kiwei.
Nalor kane, u Conrad Sangma u la ong ba ka jingangnud ka long ban pynïasoh ha kaba ïadei bad ki lad ki lynti ban kyntiew ïa ki kam jngohkai pyrthei, ka rep ka riang, seng kam seng jam bad ki lad thaw kam lyngba ka jingkyntiew ïa ki nongshna waiñ trai jylla lyngba ki soh ki pai.
U Myntri Rangbah u la ong ruh ba kane ka sienjam ba la shim da ka sorkar kam thmu tang ban kyntiew ïa ki kam pynmih waiñ, hynrei ka ban pynmyntoi ruh ïa ki nongrep, ki nongwan shangkai pyrthei bad ki nongseng kam ha ka jylla.
Ha kajuh ka por, u Myntri Rangbah u la pynpaw ruh ka jingkyrmen ba da ka jingdon ïa kane ka wine incubation ne ka jaka saiñ dur ïa ki waiñ kan plie ïa ka rynsan na ka bynta ki nongseng kam lajong ba kin pyrshang ban pyndonkam ïa kane ka tiar bad ka ban kyntiew ruh ïa ka ïoh ka kot lyngba ka jingpynmih waiñ da ki soh.
Haba pynpaw ka jingsngewkhia ha kaba ïadei bad ka jingïoh laisen na ka bynta ki nongshna waiñ, u Myntri Rangbah u la pynthikna ba ka jingsiew na ka bynta ka laisen ha kaba ïadei bad kane ka kam kan long kaba rit. U la pyntip ruh ba na ka liang ka sorkar ka la don ha ka lynti ban pynkhreh ha kaba ïadei bad ka jingleh ïa ka registration na ka bynta ban pynsuk ïa ki nongshna waiñ trai jylla.
