Shillong, Nailur 15
Ka liang pyrshah ha Ïingdorbar Thawaiñ, ka Voice of People Party (VPP) ka la hun ïa ka jingbatai u Symbud Myntri Rangbah u Bah Prestone Tynsong uba dei peit ïa ka tnat Parliamentary Affairs haba ïadei bad ka jingpynlong ïa ka Dorbar Synrai ha kaba u la ong ba wat la ka dorbar kan long tang san sngi hynrei yn pynjlan ïa ka por shong dorbar da 2 ne 3 kynta ha ki sngi ba shong dorbar bad lada kheiñlang ïa ki kynta ki ban sa pynjlan kan tam palat ïa ka shisngi.
U Bah Prestone u la batai ïa kane ha Ïingdorbar Thawaiñ ha ka sngi basdang ka Dorbar Synrai ha ka sngi Thohdieng haba u ïeng ban ai jingpynshai halor ka jingdawa ka VPP lyngba u MLA ka North Shillong u Bah Adelbert Nongrum ban pynkylla ïa ki sngi shong dorbar namar ka long kaba lyngkot eh tang 5 sngi.
U Bah Adelbert u la wanrah da ka Amendment Motion lane ka mat ban pynkylla halor ki sngi shong dorbar namar u ong ba ka jingmynjur ka Business Advisory Committee (BAC) ban pynlong dorbar synrai tang 5 sngi ka dei kaba lyngkot khamtam haba pynlong dorbar tang ar sien shisnem, bad la buh ruh tang 2 sngi ïa ka Private Members’ Business lane ki kam kiba wanrah da ki dkhot kiba dei ban pyndep hapoh ka Ïingdorbar.
Ka Dorbar Synrai mynta ka dei ka dorbar ka ba-ar jong kane Ïingdorbar Thawaiñ kaba khatwei ka Jylla.
U Bah Adelbert u la pynsyrïem ïa ka jingpynlong dorbar tang khyndiat sngi kum ka jingpynïap ïa ka synshar paidbah bad u la ong ba ki don bun tylli ki mat kiba dei ban ïakren bad pynsngew hapoh ka Ïingdorbar hynrei lada lyngkot ka por yn nym lah ban leh ïa kita.
U la kdew ba ki don ki mat halor ka jinghiar ka Jylla shatrai duh napdeng ki Jylla baduk bad ka pule puthi, ka jingjyllei u drok, ka National Education Policy, ka jingkyrduh kam, ka jingbym biang ha ka bhah pule MBBS, ka jingpynkylla ïa ka Forest Conservation Act, ka jingpynsngew paidbah ban pynïar ïa ka karkhana dewbilat ha East Jaiñtia Hills, ka jingleh bym dei ki bor pahara haba don ki jingïakhih paidbah, ka jingbteng ka jingeh haba ïadei bad ka Them Metor, bad ka jingbei pisa ban pynlong ïa ka Shillong Cherry Blossom Festival.
Kumta une u MLA ka North Shillong, u la ong ba ïa ka kaiphod halor ka jingbuh ïa ki sngi pynlong dorbar dei ban rah biang sha ka Business Advisory Committee ba kan pynbeit da kaba pynjlan shuh shuh ïa ki sngi shong dorbar.
Na ka liang u MLA ka Nongkrem u Bah Ardent Basaïawmoit u la ong ba ka jingpynlong dorbar tang 5 sngi kan nym lah ban pyndap ïa ka por ban ïatai ïa ki mat bad wat ki jingkylli kiba la kylli halor kiba bun ki mat yn nym lah satia ban pyndep hapoh san sngi.
U la ong ba ki don kumba 60 tylli ki jingkylli, tang ma u marwei u la buh kumba 20 tylli ki jingkylli bad lehse un ïoh ban kylli tang kawei, bad kiwei pat ki dkhot ka Ïingdorbar ruh kiba la wanrah ki jingkylli, kita ki jingkylli kin nym poi namar ba lyngkot ki sngi shong dorbar.
Kumta u la ong ba donkam ban pynjlan biang ïa ki sngi shong dorbar namar ba kum ka Liang Pyrshah ka ïoh shibun ki jingpynsngew na ki paidbah kiba dei ban ïakren ha Ïingdorbar kaba dei ka jaka kaba biang eh ban ïakren bad ai jingmut.
Haba ïeng ban jubab, u Bah Prestone kum u Symbud Myntri Rangbah uba peit ïa ka tnat Parliamentary Affairs u la ong ba ha ka jingïalang jong ka Business Advisory Committee (BAC) u la batai shaphang ka jingïakren haba ïadei bad ki sngi shong dorbar ha kaba la rai ruh ban pynjlan da kumba 3 kynta ha ka sngi ba shong dorbar lada donkam.
Kumta u la ong ba lada kheiñlang ïa ki kynta ki ban sa pynjlan ha ki sngi shong dorbar, kan tam pynban palat ïa ka shisngi.
Hadien ba la dep batai u Bah Prestone, na ka liang u Bah Adelbert Nongrum uba la ïeng biang ban pynsngew ïa ka jingdonkam ban ai por haba ïatai ïa ki mat ha Ïingdorbar, u la weng noh ïa ka Amendment Motion kaba la wanrah ban dawa pynjlan ïa ki sngi shong dorbar.
Ha kane ka dorbar synrai kaba san sngi kaba la sdang ha ka sngi Thohdieng, na ka liang ka Sorkar ka la wanrah katto katne ki aiñ-rew kiba donkam ban pynkylla ïa ki aiñ kiba la don lypa, nalor ki kaiphod jong ki tnat treikam bapher bapher ka Sorkar.
Ki aiñ-rew kiba la wanrah hapoh Ïingdorbar ha kane ka sngi ba sdang ka dorbar ki long, ka Captain Williamson Sangma Technical University (Amendment) Bill 2023, Rajitlal University (Repealing) Bill 2023, Meghalaya Goods and Service Tax (Amendment) Bill 2023, Meghalaya Lokayukta (Amendment) Bill 2023, Legislative Assembly of Meghalaya (Members’ Pension) (Amendment) Bill 2023, Meghalaya Medical Council (Amendment) Bill 2023, National Law University of Meghalaya (Amendment) Bill 2023, nalor ka Supplementary Demands for Grants and Supplementary Appropriation 2023-2024.
La wanrah ruh ïa ka kaiphod halor ka jinglap jingshem ka kynhun tohkit haba ïadei bad ka jingmang ïa u khaw bad ki jingbam tei met hapoh ka Integrated Child Development Scheme (ICDS) kaba la khlieh da u nongbishar ba la shongthait u Justice MC Garg.
