Shillong, Nailur:
Ka kynhun ki nongdie bad ki nongkhaïi syiar hapoh ka jylla ïa kaba la tip kum ka All Meghalaya Poultry Supplier and Retailer Association ka la bthah ïa baroh ki nongdie dohsyiar ba kin pynrung kyrteng ban leh ïa ka Food Safety and Standards Authority of India (FSSAI) License khnang ba kin long ki nongdie doh kiba bit ba biang bad kin don ïa la ki jong ki license bad ba kan long ruh ka doh kaba shngaiñ bad kaba bha ïa ki paidbah ba kin bam.
Haba kren sha ki lad pathai khubor ha ka sngi Thohdieng, na ka liang u President ka All Meghalaya Poultry Supplier and Retailer Association, u Bah Wanshai Kharshandi u la ïathuh ba ki briew jong ngi ki duna bha ban pynrung kyrteng ïalade bad ban leh license, hynrei kiwei ki briew kiba dei na kiwei ki jylla pat ki long kiba la kloi ban pynrung kyrteng bad ban leh license na ka bynta ka jingbha ka kam ka jam ka jong ki.
“Nga lyngngoh ki jong ngi pat kim ïohi khih bad kim ïohi ïa kane ka mat kaba donkam hakhmat jong ki, nga la ju ong ïa ki barabor bad ngi la ju kyntu na ka kynhun ba kane ka license ka long ka stieh bad ka jingïada ïa ki ha kaba ïadei bad ka kam kaba ki trei”, la ong u Bah Kharshandi.
Utei u nongïalam u la ïathuh ruh ba ka kynhun ka khot bad ïawer ïa baroh kiba shong die dohsyiar na kylleng sawdong ka jylla ba kin wan sha ka jingpynrung kyrteng bad ban leh license hapoh ka shlem treikam ka FSSAI ka ban long ha ka 19 tarik u Nailur, 2023.
U Bah Kharshandi u la pyntip ba kitei ki nongpynrung kyrteng ki dei ban wanrah lang ïa ki kot ki sla kiba donkam kum ka EPIC, artylli ki dur Passport size, ka No Objection Certificate (NOC) jong ki dukan kiba ki don. Ha katei ka sngi kan sa don ruh ka jingai jinghikai kaba kyrpang ha kaba ïadei bad ka rukom ot doh kaba thymmai katkum ka juk kaba mynta, ka rukom pyndonkam ïa ki tiar ki tar, ki jingbatai katkum ka rukom ban ot syiar, ki jinghikai shaphang ka jingleh khuid leh suba ïa ka doh
U la ong ba ka jingdon ïa ka license kan long ka jingshngaiñ ïa ka rukom die doh ki nongdie doh hi, bad kaba ar pat ka long ba kitei ki nongdie doh kin lah ban trei ki kam kiba heh.
