Shillong, Nailur 17
Wat la u Bah Olan Suiñ uba dei u MLA ka UDP na Mawsynram konstitwensi um don jingtip eiei ïa kiba thmu ban pan tiket, hynrei ki nongkitkam kiba la trei shitom ha ka por ilekshon MLA ba dang shu dep ki la dep pynpaw ha la ki jong ki nongkyrshan ba ki kwah ban pan tiket UDP na Mawsynram ban ïakhun ïa ka ilekshon MDC.
Kine ki ’riew rangbah kiba la pynpaw kyrteng ïalade ba ki kwah ban ïakhun ïa ka ilekshon MDC ki long u Bah Daniel Wahlang na ka thaiñ Lawbah, u Bah Kyrmen Shangdiang na ka thaiñ Phlangwanbroi bad u Bah Soli Lyngdoh na ka thaiñ Sawsymper.
Haba pyrshang ban ïakren bad u Bah Olan Suiñ ha kine ki sngi u la pynpaw ba haduh mynta ym don ba wan pynpaw ba ki kwah ban pan tiket, hynrei u la ong ban sa tip paidbah tat ynda la khot ïa ka jingïalang ka ban long ha u bnai ban wan.
Ki khubor kiba la ïoh lum la ïathuh ba kine ki ’riew rangbah kim shym la pynpaw hakhmat u MLA ba ki la kyrshan ban pynjop, hynrei ki la shu pynpaw ha la ki nongkyrshan lajong ha man ki jaka bad thaiñ.
Ym tang kine ki ’riew rangbah kiba la pynpaw kyrteng ba ki kwah ban ïakhun ilekshon MDC, pynban ki don ki nongkitkam jong u Bah Olan ki kwah ba un ïakhun hi ïa ka ilekshon MDC namar u dei lypa u MLA bad ka suk ïa u ban jop ïa ka ilekshon.
Kane ka jingsdang ban pynpaw pyrthei ki nongkitkam ka UDP ha Mawsynram ban pan tiket ka dei hadien ba ka UDP sengkmie ka la bthah ïa ki jylli (circle) ba kin lum jingïalang noh ban wad ïa ki kyrtong khnang ban ïoh ïa u kyrtong uba don jingkyrmen ban jop namar ka sah satang san bnai eiei lada kheiñ haduh ka sngi thep vote lada jia ka ilekshon ka long ha u bnai Rymphang, 2024 kumba ju long man ka san snem.
Ha kine ki sngi ki seng saiñ pyrthei ki kham leh sting ban wad kyrtong namar ki ap ïa ka dorbar parliament ba kin wanrah ïa ka jingpynkylla thymmai ha ka Sixth Schedule. Pynban namar ka sorkar BJP kam shym la wanrah shuh, dei na kane ka daw ba ki seng saiñpyrthei kiba don ha ka sorkar ki la sdang ban phah kyrtong noh ïa ki baroh ki konstitwensi kiba hap ha KHADC bad JHADC.
Ka jingïakhun ïa ka ilekshon MDC ha Mawsynram kan kham itynnad namar u Bah HM Shangpliang un nym ïakhun shuh namar ma u ryngkat ki nongkyrshan ki la leit ban ai jingkyrshan pura ïa u Bah Alvin Sawkmie uba dei lypa u kyrtong ka NPP na Mawsynram konstitwensi.
Nalor ka UDP bad NPP kiba la thikna ban pynïeng kyrtong, ka VPP bad Congress ruh ki la thikna ba kin sa pynïeng kyrtong ha kane ka ilekshon.
