Shillong, Nailur 18
U Myntri ka Sorkar Jylla, Bah A.L. Hek ha ka Lah Sngi U Blei u la kynnoh ïa ki nongpynïaid jong ka jingïakob khwai dohkha kaba la long ha ka 16 tarik mynta u bnai ha Ksehkohlong, West Khasi Hills halor ka jingduh noh jong kawei ka longkmie ïa i khun ba dang shu kha tang namar ka daw jong ka jingdheng kali.
“Ka jingkhwai dohkha ka don la ka jong ka bynta. Kaba kongsan hangne dei ki nongpynïaid ïa ka jingïakob khwai dohkha…ki nongpynïaid kim sngewthuh kumno ban pynïaid ïa kano-kano ka prokram ba ki pynlong,” la ong u Bah Hek.
U la ban jur ba kino-kino kiba kwah pynïaid ïa ka jingïakob khwai dohkha ki lah ban ïaid shakhmat bad kane ka kam hynrei ha kajuh ka por ki dei ban sngewthuh ba kane kam dei pat ban pynthut ïa kiwei.
Kumban shu kdew hangne, katei ka longkmie kaba na ka shnong Mawthawniaw ka la mih na shnong da ka jingthmu ban leit kha ïa i khyllung sha Shillong hynrei tang na ka daw ka jingdheng kali namar ka jingpynlong ïa ka jingïakob khwai dohkha ha ka Pung Pamphyrnai – kaba hap ha ka shnong Ksehkohlong, ka la duh noh ïa i khyllung hadien ba ka la kha ïa i (hapoh kali ‘tourist’ kaba shu wai) hamar ba poi ha ka shnong Tiehsaw.
Katei ka jingjia ka la jia ha ka 16 tarik u Nailur, 2023.
Na ka liang katei ka longkmie ka la ïathuh ba hadien ba ki la mih na shnong da ka jingthmu ban leit kha ïa i khyllung ha Shillong namarba la dei ka por, ynda ka la poi ha Nongspung, ki la sahkut bad ki bahaïing kiba ïadon lang ki la leit ïakren ban pyllait lem bad don katto-katne kiba ïa pyllait hynrei kiba bun kim shym la kheiñ kor ïa ka jingkyrpad hynrei ki la pynmih pynban ïa ki ktien kren heh bad kumta tang na Nongspung sha katei ka jaka ba pynlong khwai ka la shim por 3 kynta.
Ka la ïathuh ruh ba hadien ba la lait na katei ka jaka, ynda la poi ha Umlieh, ki la sahkut biang bad kumta ka la nang pynjynjar shuh-shuh ïa ki, bad hadien kane tang mar ïa poi ha kawei na ki jaka ha Tiehsaw, katei ka longkmie ka la kha ïa i khyllung hynrei kaba sngewsih ka long ba itei i khyllung i la khlad noh.
Katei ka longkmie ka la pynpaw ruh da kaba ong ba lada ym don kano-kano ka jingsahkut kali lehse kan jyn da la poi sha ki jaka sumar ha Shillong.
“Haba pynlong ïa kano-kano ka prokram, da pynïaid ha ka rukom kaba dei khnang ba kan long kaba ïaid beit ïaid ryntih. Ban shu leh lymmuh khlem da sngewthuh ïa kano-kano ka kam, ka wanrah pynban ïa ka jingeh wat ïa ka jingïap kaba la pynsngewsih haduh katta-katta haduh ban da duh ïa iwei i mynsiem,” la ong u Myntri.
U la ong ruh ba katei ka jingjia ka dei ka jingduh kaba khraw ïa ka ïing ka sem, khamtam ka la wanrah ka jingpang mynsiem ha ka kmie kaba kha ïa i khyllung.
“Ka ïalam sha ka jingmynsaw lada ma nga ne ma phi bad mano-mano ngi leh ïa kano-kano ka kam khlem ka jingsngewthuh,” u la ong.
Haba kylli, u Bah Hek u la ong ba ka Sorkar kan sa wanrah ïa ki kyndon khnang ba kin ym don shuh kiba kum kitei ki jingjia, jingmynsaw, jingeh hadien habud.
