Shillong, Nailur 19
U MLA barim ka Umroi konstitwensi, Bah George B Lyngdoh u la ong ba ha kine ki sngi u MLA ka Nongthymmai konstitwensi uba dei ruh u President ka TMC Meghalaya, Bah Charles Pyngrope u la dep pynpaw ïa ka kyrteng jong u ban ïakhun ïa ka ilekshon MP Lok Sabha na ka seng TMC na Shillong konstitwensi.
U Bah George u la ïathuh ba katkum ka jingpynpaw u Bah Charles u kren kum u riewshimet uba la krenshai ba lada ka TMC kan pynïeng kyrtong ha ka ilekshon MP Lok Sabha, ka kyrteng jong u (Bah George) ka la dei lypa hynrei u khlem pat ong ba ka seng ka la dep shim rai.
Nalor nangta, u Bah George u la ïathuh biang ba mar shu pynpaw u Bah Charles Pyngrope ïa ka kyrteng jong u kum u kyrtong MP na ka TMC, ka wan pat sa da kawei ka jingkylla namar ka mih ka kynhun synrop jong ki seng saiñ pyrthei kiba shong ha ka liang pyrshah kata ka Indian National Developmental Inclusive Alliance (INDIA).
U la ong ba ka jingmih ka kynhun synrop ka INDIA ban ïatreilang na ka bynta ka ilekshon MP Lok Sabha ban long ha u snem 2024, ka TMC ha Meghalaya ruh ka hap ban ap kaei ka ban mih ha kine ki sngi.
“Haba ngi kwah ban wanrah ïa ka jingïatylli, kaba nyngkong ba ki nongïalam ki dei ban ïatylli namar ngim lah ban khmih ïa ka jingïatylli ïa ki paidbah lada ki nongïalam kim lah ban ïatylli tang kawei ka sur” u la ong.
U Bah George u la ong ba lada ki nongïalam ki dang riehtngen ha la ki jong ki seng saiñpyrthei ka shem jingeh ban wanrah ïa ka jingïatylli hynrei ban wanrah ïa ka jingmyntoi lang donkam ban ïatylli shwa ki nongïalam.
Haba kylli haba ki seng saiñpyrthei kiba la don ha ka kynhun synrop INDIA ki la ju ïa shong ne em ha Meghalaya, u la jubab ba haduh mynta kam pat don ka jingïakynduh lang na ka bynta ban pyrkhat ïa ka ilekshon ha u snem 2024.
“Ha jingshisha ïa u kyrtong synroplang ruh ngi dei ban ïa pyrkhat lang hynrei ngi shu ïohi ha ki lad pathai khubor ba ka seng Congress ka la dep pynbna ïa u kyrtong ban ïakhun ïa ka ilekshon MP Lok Sabha” u la ong biang.
Kum ban shu kdew, ba ki seng saiñ pyrthei kiba don ha ka kynhun synrop INDIA ha Meghalaya ki long ka Congress kaba don san ngut ki MLA bad ka TMC kaba don san ngut ki MLA.
