Shillong, Risaw 13
Ha ka 13 tarik u Risaw, 2026, ha ki katto-katne tylli ki skul ha East Khasi Hills, Ri-Bhoi District, West Jaiñtia Hills District nalor kiwei-kiwei pat, ki la don sa tang ki khynnah skul khlem nonghikai bad nongtrei hadien ka rai na Khasi Jaiñtia Deficit School Teachers’ Association (KJDSTA) bad ka Garo Hills Deficit School Teachers and Employees Association (GHDSTEA), ban pynlong da ka Mass Casual Leave kaba lai sngi lane ka jingsangeh hikai bad leit trei ka ban kut haduh ka 15 tarik u Risaw 2026.
Katkum ka jingpynbna jong u President ka KJDSTA, Bah Boswell Pala, ha ka 12 tarik u Risaw, 2026, kine ki ar tylli ki Association ki la rai ban bteng ïa ka jingïakhih hadien ba kim shym la ïoh ïa ka jubab kaba biang bad kaba pynhun na ka liang ka Sorkar Meghalaya halor ki mat ba ki la pynpaw.
Ka KJDSTA ka la ong ba ka la ïoh ïa ka shithi na u Bah D. Lyngdoh, Joint Secretary ka tnad pule puthi ka Sorkar, ha ka 08 tarik Risaw, kaba jubab ïa ka dorkhas kaba ki la ai sha u Myntri Rangbah Conrad K. Sangma ha ka 25 tarik Nailur 2026.
Hynrei ka seng ka ong ba ka shithi kam shym la jubab ïa ki mat jingdawa ba kongsan kiba ki la pynpaw.
Ka KJDSTA ka la ong ba kawei na ki mat jingdawa ka long ban weng noh ïa ka Scheme 2026 bad ban pynïoh biang ïa ka Board of Trustees (BOT).
Hynrei, ka shithi na ka tnad pule puthi ka la kren shaphang ka jingpynrung PRAN, kaba katkum ka seng kadei hi ka bynta jong ka jingpyntreikam ïa ka Scheme 2026.
Haba ïadei bad ka BOT, ka shithi ka la kdew ba ki nonghikai bad nongtrei deficit la pynrung hapoh ka Board kaba la thaw ha ka 27 tarik u Ïaïong 2026, hynrei ïa kane kam shym la pdiang da ka Association.
Ka Association ka la kynnoh ruh ba don kiwei pat ki mat jingdawa kiba ka Sorkar kam shym la ai jubab satia.
