Shillong, Risaw 13
U Myntri Rangbah ka Jylla, u Conrad K. Sangma ha ka Sngi Ba-ar u la ong ba ka jingpynjlan ïa ka samoi treikam jong ka Garo Hills Autonomous District Council (GHADC) ka long ban pyndep ïa ki rukom treikam kiba donkam hashuwa ban pynlong ïa ka ilekshon.
Ka Kynhun Myntri ha ka 7 tarik u Risaw ka la rai ban pynjlan ïa ka samoi treikam jong ka GHADC da hynriew bnai.
Haba pynshai ïa kane ka rai, u Conrad u la ong ba ka Sorkar ka don jingthmu ban pynlong ïa ka ilekshon hashuwa ban kut jong ka samoi treikam ba la pynjlan.
U la ong ruh ba ïa ka jingpynbeit ryntih konstitwensi ne kata ka ‘Delimitation Exercise’ ym shym la lah ban pyndep khlem da ïoh shuwa ïa ka jingmynjur na u Lat ka Jylla ïa ka ‘Separate Electoral Roll’ (SER).
“Ka jingpynbeit ryntih konstitwensi ka long ka kam kaba bunkam bha kaba donkam ban pynrung ïa ka thup kyrteng ki nongthep ‘vote’ ba kyrpang la ka jong. Lada pynbeit konstitwensi khlem kane, ka pynkylla khongpong lut ïa kiei-kiei baroh,” u la ong.
Ïa ka SER la mynjur da u Lat kumba 10 sngi hashuwa, hadien kata ka komiti pynbeit konstitwensi ka la ïaid shakhmat bad ka jingtreikam kaba khatduh, u la ong.
“To ai ba ngan kren shai sha ki nongshong shnong, khamtam ha Ri-lum Garo ba kane ka dei ka kam kaba donkam. Ngim pyrshang ban pynslem ïa ka ilekshon. Ym lah ban pynlong ilekshon khlem ka jingpynbeit ryntih konstitwensi bad ïa ka jingpynbeit konstitwensi ym lah ban pyndep khlem ka SER,” la ong u Conrad.
“Mynta ba la pyndep ïa ka SER, yn sa pyndep ïa ka jingpynbeit konstitwensi, yn sa pynmih ïa ka thup kyrteng ki nongthep ‘vote’ bad yn sa pynlong ruh ïa ka ilekshon. Kine ki kam baroh ki don jingïadei lut bad ngi kyrmen skhem ban pyndep ïa kane hapoh hynriew bnai bad ban pynlong noh kloi ïa ka ilekshon,” u la bynrap.
