Shillong, Risaw 13
U Myntri Rangbah ka Jylla u Conrad K Sangma ha ka sngi Ba-ar u la plie ïa ka Meghalayan Age Pavilion ha Ward’s Lake bad ka pynpaw ba kane ka dei ka jingshem kaba shisha halor ka Meghalaya kaba wanrah lang ïa ka bam, ki tiar kiba la pynmih hi hapoh ka Jylla, ki nongsengkam lajong, ki nongthaiñ kti bad ïa ka sap ka phong ha ka rukom pynwandur kaba itynnad.
“Kane ka Pavilion ka ai ïa ka jingshem kaba shisha shaphang ka Jylla Meghalaya. Ka wanrah lang hajuh ïa kiba bun tylli ki khana kiba batai ïa ka Jylla. Ka jingïohi jngai ka jong ngi ka dei ban thaw ïa ki jaka ki ban ym tang ban pynmih ïa ki lad khaïi pateng hynrei ban rakhe bad ban pyni nam ïa ka kolshor, ki jingdon jingem kiba naduh hyndai hynthai bad ka jinglong tynrai jong ka Meghalaya,” ong u Myntri Rangbah.
Ha kane ka sngi plie la ïadon lang ryngkat u Myntri ka tnad Kam Jngohkai u Timothy D Shira, ki heh ophisar Sorkar, ki nongsengkam bad ki nongthaiñ kti. Ha kane ka sngi, u Director ka Urban Affairs u la aiti ïa ki jingtei sha u Chairman bad Managing Director ka Meghalayan Age Limited ban pynïaid bad ruh ban khmih ïa ki.
La tei ïa kane ka jingtei ha ka jinglut kaba kot T.11.52 klur ha ka jaka kaba 16,000 sq ft hapoh ka phyllaw jong ka jaka sah u Deputy Commissioner, ïa kane ka Pavilion lah ban ïohi ïa ka jingmih na ka jingshimkhia ka Sorkar lyngba ka Creative Redevelopment Plan for Shillong, la ong ki ophisar.
Ïa kane ka Plan, la ïaroh da ka Ministry of Housing and Urban Affairs kum ka Model jong ka jingtei ha ki jaka rilum, ka jingpyndonkam ïa ki jaka ka Sorkar na ka bynta ban pyndonkam ki paidbah bad kala ïoh ïa ka jingïarap lyngba ka Challenge-Based Funding hapoh jong ka Special Assistance to States for Capital Investment 2025-26.
Kiwei pat ki project hapoh jong kane ka Plan ki kynthup ban tei biang ïa ka Lad ha Anjalee, PWD Complex ha Barik, ka jingpynneh ïa ka mariang ha Ward’s Lake, ka Public Park ha ka jaka jong ka Raj Bhavan, ka Street Food Hub ha ka jaka jong ka State Guest House bad ka Wah Umkhrah Riverfront Development. Kan don ruh ïa ki jaka die jingdie kyrpang kiba la tei ha Brightwell Bungalow, Barik, Laitumkhrah bad Dhankheti.
Kane ka Pavilion kala pyninam halor ki 4 tylli ki bynta, ki jingseng kam kiba ïoh jingkyrshan na ka PRIME, Meghalayan Age Shillong Store kaba don ïa ki jingthaiñ ïa ki tiar bad ki jaiñ, ka Wellness bad Artisanal Products, ka Food bad Hospitality Zone bad ka Fruit Wine Experience Centre.
Ki don 16 ngut ki nongsengkam lyngba ka PRIME kiba la ïoh pdiang ïa ki shithi ban sdang pyntreikam ha katei ka Pavilion. Ïa ka Restaurant la aiti ha ka nongjop ïa ka Hills on a Plate, Adonijah Lyngdoh, katba ïa ka Fruit Wine Experience Centre la aiti sha ka Meghalaya Fruit Wine Makers’ Association.
La pynkut ïa kane ka jingplie da ka jingpyninam ïa ka jinglum thup ïa ki jaiñ ryndia da u Bah Daniel Syiem bad ka jingpynbyrngia na ki kynhun hapoh jong ka Meghalaya Grassroots Music Project.
