Nongstoiñ, Risaw 13
Ki nongtrei Crusher, nongtih maw tih shyiap, ki nongkhaiï maw, khaïi shyiap hapoh ka lama jong ka seng ki nongbylla shyiap, maw crusher, pick-up kamai & Auto Truck ka West Khasi Hills ha ka sngi Ba-ar kila hiar sha ka ophis u Divisional Forest Officer (DFO) ka West Khasi Hills, halor ka jingkam ba ki ïai shah khot hajir ïa ki crusher kiba trei ïa ki kam barit hapoh ka thaiñ.
U Bah Mawkordor Kharsyiemlieh, Secretary ka seng haba pynpaw halor ka jingleit ha katei ka ophis u la ong, “Ngi wan hangne da ka jingsngewkhia hadien ka jingshah khot hajir jong ki nongtrei crusher ba rit ba ria bad ka jingshah khot hajir kala long man ka por hynrei ka shu kut beit tang ha ka jingïakren bad ïa mynta ka kynti ngi la thait bad ka don ka jingsngew lehraiñ ka jong ngi kum ki nongshong shnong ba ki kheiñ ïa ki nongtrei crusher ki jong ngi ba ki long beaiñ,” bad u la buh ruh ka jingkylli ba hapoh ka Jylla uei u mar u bym long beaiñ.
Shuh shuh u la ong, na ka liang ka Seng kala shim da ka rai ba baroh ki nongtrei maw shyiap, crusher bad ki nongbylla auto truck bad pick-up kin trei beit bad ha kaba u la bynrap, “Ngin ym riej ne tieng hynrei ngin ïaid shakhmat ïa ka jingtrei ka jong ngi lada shah kem uwei ngin bud lang baroh bad lada ka Sorkar kam lah ban pynbeit kloi kloi ïa kane, kan sa mih kaei-kaei kaba sniew bha hakhmat jong ngi u paidbah”.
U Bah Mawkordor u la ong ruh ba ha ka jingïakren bad u DFO la sngewthuh ba ka jingshah khot hajir ka dei beit tang ka jingshah hukum ha ki bor kiba halor ha kaba u DFO u hap ban shu kohnguh ïa kaba la bthah najrong.
U la ong ruh ba na ka liang jong ka seng kala dep ban kren shai hakhmat u DFO ba yn trei beit bad lada don ba wan khang yn nym ïaleh pyrshah hynrei haei ki phah yn ïa leit lut.
“Kane ka jingleh ka Sorkar ka long kumba la shu ñion beiñ ïa ngi ki rit ki ria ha kaba kala ktah ym tang ha WKH hynrei ha ka Jylla hi baroh kawei ha kaba kala wan urlong ka ktien kaba ong ba ngin sa long ki nongtong um bad nongthoh dieng jongno re jongno bad ki don ki briew kiba dei ki heh saipan kiba kwah ban pyndonkam da ka ‘mining’ ha kaba ki kwah ïa ngi ban ngin rieh tngen kumba leh ïa u dewïong bad ïa kiwei-kiwei bad ngi, ngi kwah ban trei laitluid,” u la ong.
Shuh shuh u la ong, “Hooid donkam ïa ka aiñ hynrei ka dei ban sting ïa ngi kiba trei kum ki trai jaka namar ban shu kynthup lang ïa ngi ha ka thup kum ki nong supply shabar Jylla kata ka bym lah ban long namar ngi trei tang hapoh Nongstoiñ lajong bad ban leh mining ka bym lah satia ban long”.
