Shillong, Risaw 13
Ka ïingbishar Meghalaya High Court ha ka sngi Ba-ar kala aipor ïa ki 19 ngut ki nongïasaid aiñ kiba ngat ha ka ‘criminal contempt’ ne jingïaleh pyrshah ïa ka hukum ka ïingbishar namar ka jingkhot ïa ka jingïakhih ban pep leit pyndep ïa ki kam ka ïingbishar, ba kin ai ïa ka affidavit ban pan map khlem ka jingbuh kyndon.
Katkum ka hukum ba la pynmih ha ka 8 tarik Risaw, 2026, bad ai notice hapoh ka Section 15 jong ka Contempt of Courts Act, 1971 pule lang bad ka Article 215 jong ka Riti Synshar ka Ri India, baroh ki nongïasaid aiñ ba ngat mukotduma kila don hi da lade, lait noh ki nongsaid aiñ kiba don ha ka serial number 13 bad 15 (vi), ong ka Division Bench ka Chief Justice Revati Mohite Dere bad u Justice HS Thang-khiew.
“Baroh kila pan por ban aiti ïa la ki jong ki affidavit ban pan map khlem kyndon bad kular ruh ban nym leh shuh ïa kum kane ka kam. La mynjur ban ai ïa ka por. Yn shim bishar biang ïa kane ka kam ha ka 14 tarik Risaw, 2026,” ong ka ïingbishar.
Ka ïingbishar ha ka 8 tarik Risaw kala register ïa ka suo motu PIL No. 21/2026 bad ñiew beiñ ïa ka jingpep khlem pud ban wan sha ïingbishar da ka Shillong Bar Association bad ka High Court Bar Association naduh ka 1 tarik Risaw ba dawa ban weng ïa u Advocate General.
Ka ïingbishar kala phah notice sha ki 21 ngut ki nongkitkam jong ki Association, kata 14 ngut na ka High Court Bar Association bad 7 na ka Shillong Bar Association ba kin ai jingpynshai balei ba ym dei ban tian bishar criminal contempt ïa ki bad bthah ïa ki ba kin wan mih hi dalade hakhmat ka ïingbishar ha ka 13 tarik Risaw.
Kiba ngat ha ka mukotduma contempt ki kynthup ïa u President ka High Court Bar Association K S Kynjing, Vice President N Syngkon bad Pyllang Nongbri, Secretary General Kishore Ch Gautam, Secretary Andrew R Passah bad Arnold G Momin, Treasurer Sujit Dey, ki executive member kata Apu Dey, Andrew M Sangma, Cherak C T Sangma, Jonathan M Thangkhiew, H L Shangreiso, Melvbin M Laitmon, Raymond K Majaw bad Rosylia Kharshiing.
Na ka Shillong Bar Association ki kynthup ïa u President HR Nath, Vice President Nelson Kharnarbi, Secretary Teiborlang Jyrwa, Assistant Secretary N Shyambor Singh Marpan bad Nurina N Lyngdoh, Treasurer Ilawanda S Lyngdoh bad executive member Kishore Ch Gautam, Ricky Nelson Marbaniang, Jonathan M Dkhar, Jyoti K Marak, Krishna Sharma bad Stevie R Lyngdoh.
