Shillong, Nailur 20
U Myntri Rangbah ka Jylla, u Conrad K. Sangma ha ka Sngi Balang u la ong ba ka Sorkar Jylla na ka por sha ka por ka buddien na ka tnad kam pohïing ka Sorkar Pdeng halor ka Inner Line Permit (ILP) bad ka dang ap ïa ka jubab na ka Sorkar India halor kane ka bynta.
U Sangma u la ong ïa kane hapoh ïingdorbar haba jubab ïa ka ‘Call Attention’ ba la wanrah da u MLA ka Nongpoh, Bah Mayralborn Syiem.
“Ka jingdawa na bynta ka ILP ka la sahteng la slem bah mynta. Kane ka jingdawa ka la kham khlaiñ hadien ba la pynlong aiñ ïa ka Citizenship Amendment Act (CAA),” la ong u Myntri Rangbah.
Ha kajuh ka por, u la pynkynmaw ba dei ha ka por jong ka Sorkar MDA-I ba la khot ïa ka Dorbar kyrpang ha ka 19 tarik Nohprah, 2019 bad ka ïingdorbar da kawei ka sur ka la mynjur ïa ka rai haba ïadei bad ka jingpyntreikam ïa ka ILP hapoh ka Jylla.
U Sangma u la pynkynmaw ruh ba ka kynhun MLA ka Jylla ka la ïakynduh ïa u Myntri ka tnad kam pohïing ka Sorkar Pdeng, u Ami Shah ha New Delhi ha ka 20 tarik Rymphang, 2020 ha kaba ka kynhun ka la ïoh jingtip ba ka Sorkar Pdeng ka dang khmih bniah ïa ka rai ba la mynjur da ka ïingdorbar thawaiñ ka Jylla bad la kular ruh sha ka kynhun ban ym pyntlot ïa ki hok jong ki trai-ri ka Jylla.
Na ka liang u Sangma u la kdew ba ha ka Plenary Session ba 69 jong ka North Eastern Council (NEC) kaba la ïashim bynta da u Myntri ka tnad kam pohïing ka Sorkar Pdeng ha ka 23 bad 24 tarik Kyllalyngkot, 2021, ki kynhun seng bapher-bapher ki la thoh shithi sha ka ophis Deputy Commissioner, East Khasi Hills, ban kyrpad ïakynduh ïa u Shah bad la shah ïa 7 ngut ki dkhot na kawei-kawei ka kynhun seng ban ïakynduh ïa u Myntri ha kaba ki la pynsngew halor ka jingdonkam ban pyntreikam ïa ka ILP hapoh ka Jylla.
“Ha kane ka jingwan jong u Shah, ka Sorkar Jylla ka aiti ruh ïa ka dorkhas ha kaba ka mat halor ka jingdawa ban pyntreikam ïa ka ILP hapoh ka Jylla la kynthup lang nalor kiwei-kiwei ki mat jingdawa,” u la ong.
U Myntri Rangbah u la ïathuh ruh ba ka 17 tarik Nailar, 2022, ka North-East Students’ Organisation (NESO) lem bad kiwei-kiwei ki kynhun seng ki la pynlong ïa ka jingshong kyllaiñ mungor ha Shillong kum ka jingpyrshah halor ka jingpyntreikam ïa ka CAA, ha kajuh ka por ban pynsawa ïa ka sur jingdawa na bynta ka jingpyntreikam ïa ka ILP hapoh ka Jylla.
U la ong ruh ba hadien ba la phah ïa ka rai ba la mynjur da ka ïingdorbar ha u snem 2019, ka Sorkar ka la leit mih sha ka tnad kam pohïing ka Sorkar Pdeng halor katei ka bynta ha u Naiwieng, 2020.
Shuh shuh u Sangma u la bynrap mynta u snem – 8 tarik Nailar, 2023 ma u lem bad ka Kynhun Myntri jong u ki la ïakynduh ïa u Myntri Rangbahduh ka ri, u Narendra Modi ha New Delhi bad aiti ïa ka dorkhas halor ki mat bapher-bapher ba kynthup ïa ka jingdawa ban pyntreikam ïa ka ILP hapoh ka Jylla.
