Khliehriat, Nailur:
Ka Khasi Students’ Union (KSU) EJHD Unit ryngkat ki nongïalam shnong ki la pynpaw ka jingpyrshah ha kaba ïadei bad ka jingthmu jong ka NHAI ban pan jingbit na ka bynta ban sdang lum khajna ha ka Toll Plaza ha Lumshnong katba kam pat lah ban maramot ïa ka surok kaba la jot rathai.
Kane ka jingshim rai ka la wan hadien ka jingïalang kaba la long ha ka Sngi Ba-ar hapoh ka kamra jingïalang jong u Deputy Commissioner ka East Jaiñtia Hills District ban ïakren ha ka jingïadei bad ka jingkwah jong ka NHAI ban plie Tollgate.
Ha kane ka jingïalang la wan ïashim bynta da ki katto katne ki nongïalam shnong bad ki dkhot ka KSU EJHD Unit, ha kaba la pynïaid ïa ka jingïalang da u Additional Deputy Commissioner, Bah G Warjri, hynrei ym shym la don satia ki ban wan mihkhmat na ka liang ka NHAI.
Kumta na ka liang ka seng bad ki nongïalam shnong ki la ïeng pyrshah ïa ka jingthmu jong ka NHAI, kata da kaba ïeng skhem ruh ha ka nongrim ba katba ka jingpynbha surok kam pat dep, ka NHAI kam lah ban plie ïa katei ka jaka lum khajna.
Na ka liang u Additional Deputy Commissioner ruh u la kular ban phah ïa katei ka rai sha ki bor NHAI bad sha ki bor sorkar ba halor.
Shuh shuh ka KSU ka pynpaw ruh ïa ka jinglyngngoh namar ka tharai ba ka sorkar kan khot jingïalang ban ïatai halor ka jingbym shimkhia ka NHAI halor kane ka surok, hynrei ka khot pynban ban ïakren ban plie ïa ka khyrdop lum khajna.
