Shillong, Nailur 20
Ka sorkar jylla ka la ai syrnod (Certificate) dalade ïalade ba ka la don ka jingkiew na ka 2 sha ka 70 ngut ki khynnah skul kiba la sdang ban shong da ki bos ba ka la pynkhreh kum shi bynta ban pynduna ïa ka dheng kali ha ka nongbah.
Hynrei, na ka liang ka Meghalaya High Court ha ka Sngi Balang ka la kynthoh ba kane ka jingai syrnod kam don jingmut namar haba la peit bniah, ki lah ban don palat 50,000 ngut ki khynnah skul tang ha Shillong.
“Katkum ka kaiphod ba la ai ha ka 22 tarik Nailar, 2023, la pyni ba 70 ngut ki khynnah skul ha ka nongbah ki la pyndonkam da ki bos ba la pynbiang da ka sorkar. Watla ka sorkar ka ai syrnod dalade ïalade da kaba ong ba ka jingdon ki khynnah kiba pyndonkam da ki bos ka la kiew na ka 2 sha ka 70 ngut, hynrei kane kam don jingmut shisien ba la sngewthuh ba ka jingdon ki khynnah skul ha kane ka nongbah ka lah ban tam ïa ka 50,000 ngut,” la ong ka High Court.
Katei ka jingkynthoh ka High Court ka la long ha ka por ba ka bishar ïa ka mukotduma kaba ïadei bad ka jingkhapngiah bad ka dheng kali ha Shillong.
“Ha kiba bun ki bynta, ka ïingbishar ka la pynpaw ïa ka jingsngewkhia ym tang namar ba ka jinglong jingman ka long kaba ishyrkhei, hynrei wat ka sorkar jylla kam i don ka jingkwah ban leh eiei halor kane ka mat. Ka dheng kali ha Shillong, lehse, ka dei kaba wan nyngkong eh,” la ong ka High Court.
La palat shi snem, ka High Court ka la kdew ba ki la don ki jingïalang, la ai ki kaiphod bad la ai jingmut ruh ban pyntreikam ïa ki katto katne ki sienjam, hynrei kam pat don ka jingkylla. Ka la ong ruh ba ka jingeh ka la nang sniew man la ka sngi.
“Lada hap ban shong liengsuiñ na Umroi ne Guwahati, hap ban buh por lypa palat shi kynta tang ban lait na ka dheng kali ha Shillong. Ha ka por mynsngi hadien ba la wai skul, ka don ka jingsahkut kaba jur ki kali. Ka jinglong jingman ka kham biang hadien kata, hynrei ynda la dap 5 baje janmiet, ka la long biang kumjuh,” la kdew ka High Court.
Ka la ong ruh ba watla ka sorkar ka la pynkhreh ïa ka kaiphod ba la ïoh na kawei ka shlem kaba nabar ri, bad hadien ba ka High Court ka la tuklar, la kyrpad ïa ka IIM Shillong ban ïarap ban peit halor kane bad ka la don ruh ka jingïalang ba la pynlong, hynrei kam pat shym la don satia kano kano ka jingmih.
“Kaba kham sniew ka long ba ki nongdie dukan ki la tur sha ki surok kaba buh jingeh ïa ki nongleit nongwan kiba ïaid kjat, bad namarkata, ki hap ban ïa ïaid lang bad ki kali ha surok. Na ka bynta kiba la rangbah bad kiba don jingduna ha ki dkhot met, ki surok ha Shillong ki long ka jingma ïa ka jingim briew,” la ong ka High Court.
Wat hapdeng kine kiei-kiei, ka High Court ka la ong ba ka sorkar ka leh ba ka jinglong jingman ka biang beit thik. Ha ka jingshisha, ka High Court ka la ong ba shisien ba ka ïingbishar ka la kyntu ïa ka sorkar ban leh eiei halor ki jingeh, la khmih lynti ba ka sorkar kan shim ïa ki sienjam kiba donkam.
“Kaba sngewsih pat ka long ba ka sorkar ka la jied ban ym leh eiei ha kaba ïadei bad ka jingpynkylluid ïa ka jingkhapngiah ha sor Shillong da kaba pynïaid bha ïa ki kali lane ban buh ïa ki surok ‘one-way’ lane ban weng ïa ki nongdie jingdie bad kiwei ki bym dei satia ban don ha ki surok lane ki lynti ïaid. Ka long kaba shai ba ka sorkar kam don satia ïa ka mon bad ka jingïalam,” la ong ka High Court.
Shuh shuh ka la ong ba ka sorkar kan leh ïa kaba dei lada ka lah ban khang ïa kito kiba tur sha surok bad kiba la klun ïa ki lynti ïaid kjat (footpath) lane ban pynshong noh ïa ki shawei khnang ba ïa ki surok bad lynti ïaid kjat yn lah ban pyndonkam tang ban ïaid kali bad ïaid briew.
