Nongpoh, Nailur:
U Deputy Commissioner (DC) ka Ri Bhoi District, u Arpit Upadhyaya ha ka jingpyllait khubor ha ka Sngi Ba-ar u la pynbna ïa ka jingkhang ban pyndonkam ïa ki jait plastik kiba ka jingrben ka jong ki kam long kaba biang katkum ka jingbthah ba la pynmih da ka Meghalaya State Pollution Control Board (MSPCB).
U DC u la pyntip ruh ba katkum ka Rule 4(1) jong ka PWM (Amendment) Rules, 2022, ki plastik kiba lah ban pyndonkam (kiba la shna lyngba ka virgin lane recycled plastic) ki dei ban long kiba rben ym duna ïa ka 120 Microns bad ïa kane la sdang ban pyntreikam naduh ka 31 tarik jong u Nohprah, 2022.
Shuh shuh, u la pyntip ruh ba katkum ka Rule 10 (3&5) jong ka PWM (Second Amendment) Rules 2022, ki biodegradable plastik ki dei ban long katkum ki kyndon ba la buh da ka Bureau of Indian Standard (BIS) bad ruh kiba la pynshisha da ka Central Pollution Control Board (CPCB).
Kumta halor kane ka bynta, la khang pyrshah ïa baroh ki industry, ki commercial establishments, e-commerce companies, online marketplaces, importers, stockists, distributors, retailers, sellers, bad ki paidbah ruh kumjuh bad kim dei ban shna, ban wanrah, ban thied pateng bad ban die ïa ki jait plastik kiba la khang pyrshah kiba kam kum kita ki biodegradable lane ki oxo-biodegradable khlem da don ïa ka syrnod jingpynshisha na ka CPCB.
