Shillong, Nailur 21
Ka Resolution ba la wanrah da u MLA ka Voice of the People Party (VPP) na Nongkrem u Bah Ardent M Basaïawmoit, ban kyntu shim khia pyrshah ïa ka jingdon jong ka jingpynkheiñ ïa ki kyndon jong ka Meghalaya Transfer of Land Regulation Act, 1972, ka la shah liem da ka ‘voice vote’ ne ka vote da ka sur hapoh ka ïingdorbar thawaiñ ha ka sngi Palei.
U Lamphang ka ïingdorbar u Thomas A Sangma u la pynbna ïa kane, da kaba ong, “Ki Nos ki la jop bad ka resolution ka la shah rem noh, kata hadien ba ïa kane ka resolution la buh hakhmat ki dkhot ka ïingdorbar ban vote hadien ka jingrai jong u Bah Ardent Basaiawmoit ban nym weng ïa ka, da kaba pynpaw ïa ka jingbym hun satia halor ka jubab kaba la ai da ka sorkar.
U Bah Ardent u la ong ba ka don ka jingpynkheiñ ïa ka Act hynrei ka Sorkar kam kwah ban pdiang ba ki briew ki bym pat shah kdup ha ka Land Transfer Act, ki la ïathied jaka naphang ha ki bynta jong ka Ri-Bhoi District.
“Kumno ki lah ban thied jaka haba kim dei ki nongshong shnong ka Meghalaya? Kaei kaba ka Sorkar kan leh pyrshah ïa kine ki briew bad khang ïa ki ban thied ïa ki jaka ha Ri-Bhoi?” u la buh jingkylli.
U la kyntu ruh ïa ka Sorkar Jylla ba kan pynmih ïa ka public notice ne ka jingpynbna paidbah halor ka jingbatai ba bniah ïa ka jingmut ‘riewlum’ (Tribal).
U Bah Ardent u la kyntu ruh ïa ka sorkar ba kan weng ne ‘delete’ noh ïa ki ar tylli ki section kiba la bsuh bad don ha kane ka aiñ, kiba long ka jingkhang ban plie lad ïa ki briew nabar ban thied jaka.
U Bah Ardent haba wanrah ïa ka Resolution, u kwah ban tip “kiei ki sienjam ba la shim pyrshah ïa kito ki briew kiba la die ïa la ki jaka sha ki briew ki bym shah kdup ha ka Land Transfer Act, khamtam u Syiem ka Raid Marwet uba la ju mlien ban leh ïa kine ki kam beaiñ. Nalor kane, kaei ka sienjam ban sa shim pyrshah ïa u Deputy Commissioner uba kloi ban pynrung kyrteng ïa kine ki jaka kiba long pyrshah ïa ki kyndon jong ka aiñ”.
U Bah Ardent u la ong ba ka la don ka jingpynkheiñ ïa ka aiñ khyndew, ka Meghalaya Transfer of Land Regulation Act, 1972 kaba dei ka aiñ ba khang ïa ki briew nabar Jylla ban thied jaka ha kane ka Jylla, bad bynrap ka sorkar ka la pyntlot ïa kane ka aiñ.
Une u MLA ka Nongkrem u la pynpaw ka jingsngewkhia namar ka jingshah pynkheiñ ka aiñ khyndew jong ka Jylla, bad ong ba ka rai jong ka Sorkar ban ai jaka haduh 45.01 akar ha New Shillong sha ki ophisar IAS ka dei ka jingpynkheiñ ïa ka Meghalaya Transfer of Land Regulation Act, 1972.
U la pyntip ruh ba ha ka 9 tarik u Nailar, 2007 ka la mih ka rai ba la shim da ka Kynhun Myntri ban ai jaka ïa ki IAS ophisar ki bym dei na kane ka Jylla ha New Shillong Township, ha kaba la mynjur ban ai jaka haduh 45.01 akar sha ka Civil Service Officers Co-operative Housing Society da kaba siew tang T.19,60,636 kaba mut lada kheiñ ïa ka dor ka jaka, kan long tang shi tyngka shi square phut.
Une u MLA ka Nongkrem u la pyntip ruh ba dang shen ka la don biang ka jingpyrshang ban pynkheiñ ïa ka Land Transfer Act, lyngba ka jingtyrwa kaba la mih na ki Myntri ka Sorkar Jylla ban ailad ban thied jaka ïa ki doktor kiba dei nabar Jylla ha Meghalaya, khnang ban lah ban pynbiang bad pyndap ïa ka jingduna ki specialist doctor.
Ha kajuh ka por u Bah Ardent u la kynthoh ruh halor ka jingdie jaka hapoh ka Raid Marwet ha Ri Bhoi District ba la donkti da u Syiem Raid, bad buh jingkylli ba aïu ka Sorkar kan leh halor kane ka jingpynkheiñ ïa ka aiñ.
Ha ka jingjubab na ka liang u Myntri ka tnat Revenue & Disaster Management u Bah Kyrmen Shylla haba u la pule ïa ki kyndon ka Meghalaya Transfer of Land Regulation Act, 1972, u la pynpaw da kaba ong ba kam don satia ka jingpynkheiñ ïa ka aiñ.
U Myntri u la ong ba ka la shai ba ka Sorkar haba pynïaid ïa ki kam ba ïadei bad ka transfer, mutation, mortgate, will bad kiwei kiwei, ka ju ïaid katkum ki kyndon ba la buh ha ka Meghalaya Transfer of Land Regulation Act, 1971 9Act 1 of 1972) bad ka Meghalaya Transfer of Land Regulation Rules, 1974.
Katba na ka liang u Myntri Rangbah ka jylla u Conrad K Sangma haba bynrap lang ha ka jubab, u la ong ba kam shym la don satia ka jingpynkheiñ ïa ka Land Transfer Act, ha kaba ïa baroh ki kam ba ïadei bad ki bar jylla ki dei kiba la pynshong nongrim katkum ki kyndon ka aiñ.
U Conrad u la ong ba kino kino ki briew ki lah ban leit sha ïingbishar lada ki don ka jingsngewkhia ne lap ba ka don ka jingpynkheiñ ïa ki kyndon jong ka aiñ bad ong ruh “Ngim pat ju ïohi ïa kano kano ka case bala wanrah hakhmat bad ïa kito ki case kiba ka ïingbishar kala ai hukum, ka Sorkar kala dep pyntreikam ïa ki hukum.”
