Shah kyntait ka ‘resolution’ ban pyrshah ïa ka aiñ khlaw naba pyneh u Bah Adelbert hadien ba la pynshai ka Sorkar

U Bah Adelbert u la wanrah ïa ka resolution ban pyrshah ïa ka Forest (Conservation) Amendment Act, 2023 kaba dang shu dep mynjur shen da ka Parliament.

Shillong, Nailur 21

Ka rai lane ‘resolution’ ban pyrshah ïa ka aiñ khlaw kaba dang shu dep pynkylla shen ka Sorkar Pdeng, kaba la wanrah da u MLA ka North Shillong u Bah Adelbert Nongrum ka la shah kyntait war noh ha Ïingdorbar Thawaiñ ha ka sngi Palei hadien ba une u MLA um shym la treh ban weng wat hadien ba ka Sorkar Jylla lyngba u Myntri Rangbah u Conrad K Sangma, ka la pynshai halor ki bynta jong ka aiñ kiba la u pynpaw ba kin ktah ïa ki jaka khlaw ha Jylla khamtam haba ym donkam shim jingbit shuh na ka tnat khlaw ban leh ïa ki projek kiba dei na ka bynta ka jingshngaiñ jong ka ri ha ki jaka kiba hap hapoh 100 km na khappud bad kiwei ki ri.

U Bah Adelbert Nongrum u la wanrah ïa ka resolution kaba u la kren hi tang ma u ha Ïingdorbar bad ki para MLA jong u kiba dei na ka VPP ruh ki khlem ïeng lang ban ïashimbynta ban kyrshan ïa ka resolution.

U Bah Adelbert u la wanrah ïa ka resolution ban pyrshah ïa ka Forest (Conservation) Amendment Act, 2023 kaba dang shu dep mynjur shen da ka Parliament.

U Bah Adelbert u la ong ba ka Ïingdorbar Thawaiñ ka dei ban shim rai lang ban pyrshah ïa kane ka aiñ khnang ban ïada ïa ka hok jong ki trai muluk ka Jylla haba ïadei bad ka jaka bad ki jingdon jingem ha ka.

U la ong ruh ba kane ka aiñ kaba dang shu dep pynkylla thymmai kan shah ban pyntreikam ïa ki jaka khlaw na ka bynta ki projek kum ka surok, lynti rel, bad kiwei ki projek kiba kongsan bad kiba long ka jingshngaiñ ïa ka ri ha ki jaka khlaw kiba hap hapoh 100 km na khappud jong ka ri India khlem da donkam shuh ban shim jingbit na ka tnat khlaw ka Sorkar Pdeng.

U Bah Adelbert u la kdew ruh ïa ki jaka khlaw kiba donkam ban ri ban sumar bad ïada kum Ki Khlaw Ri-Kynti, Ki Khlaw Shnong, Ki Khlaw Raid, Ki Law Syiem, Ki Law Adong and Ki Law Kyntang lada ki MLA ki dei ban pynsawa ka sur jong ki pyrshah ïa ka Forest Conservation (Amendment) Act, 2023.

Une u MLA u la kdew ruh ba u uranium ruh u don ha ki jaka khlaw ka South West Khasi Hills district, bad ka dei hok ban pyrshah ïa ka  Forest Conservation (Amendment) Act khnang ban ïada ïa ka hok ki trai muluk haba ïadei bad ka jaka bad ki jingdon jingem hapoh jong ka.

U la ong ruh ba ka Jylla Mizoram bad Nagaland kiba la don lypa ka aiñ kum ka Article 371 ki dang shim rai (resolution) pyrshah ïa ka Forest Conservation (Amendment) Act, balei ka Meghalaya ruh kam lah ban leh.

Na ka liang u Myntri Rangbah u Conrad K Sangma u la ai jubab ban pynshai halor ki bynta kiba la kdew u Bah Adelbert ha kaba u la ong ruh ba kane ka aiñ kaba la pynbeit thymmai kan nang ïarap ban pynkhlaiñ ïa ka bor jong ki Jylla namar wat ka jingbatai shaphang ka khlaw ruh la lah pyntreikam katkum ka aiñ jong ka Jylla ym katkum ka jingbatai hapoh ka aiñ Indian Forest Act lane ki jingbatai ha kiwei pat ki aiñ.

U Conrad u la ong ba ha Meghalaya ka jingbatai shaphang ka khlaw bad ka aiñ jong u snem 1927 ym shym la pyntreikam hynrei ïa ka jingbatai shaphang ka khlaw la leh hi katkum ka aiñ jong ka Jylla. 

U la ïathuh ba ka Sorkar Jylla ka la shim ruh ïa ka jingïasyllok bad u Advocate General ka Jylla bad na ka liang ka Sorkar Jylla kan ïakynduh ruh ïa u Myntri ka Sorkar Pdeng uba peit ïa ka tnat khlaw na ka bynta ban kham shai shuh shuh haba ïadei bad ki jingpynsngew.

U la pynshai ruh haba ïadei bad ki projek kiba kongsan na ka bynta ka ri kiba hap hapoh 100 km na khappud jong ka ri kiba ym donkam shim jingbit na ka tnat khlaw hynrei kiwei pat ki jingbit kiba donkam ban shim donkam ban shim beit kum na ki District Council lane kiwei kiwei ki tnat.

Wat la u Myntri Rangbah u la pynshai, hynrei u Bah Adelbert um shym la ïahap satia bad ym treh ban weng noh ïa ka resolution.

Kumta namarba um shym la weng, la shu leh da kaba shu pynsawa sur ha kaba ka sur kiba don sha Liang Synshar ka kham sawa jam; kaba mut ba ka resolution jong u Bah Adelbert ka la shah kyntait noh namar ka la rem.