Shillong, Nailur:
U Myntri Rangbah ka jylla u Conrad K Sangma u la pyntip ba ka sorkar jylla ka la ïoh pdiang ïa ka song jingïarap pisa kaba haduh T.135.08 klur kaba hap hapoh ka Pradhan Mantri Khanij Kshetra Kalyan Yojana (PMKKKY) naduh ba la pyntreikam ïa ka kat haduh mynta.
Ïa kane u Myntri Rangbah u la pyntip hapoh ka ïingdorbar haba jubab ïa ka jingkylli ba la wanrah da u MLA ka UDP na Shella u Bah Balajied K Synrem, ha kaba u la ïathuh ruh ba tang na ka bynta ka East Khasi Hills kata hapdeng u snem 2022-2023 ka sorkar ka la ïoh pdiang haduh T.9.67 klur lyngba kane ka skhim.
U Myntri Rangbah u la ong ba ïa kane ka skhim ba la pyntreikam lyngba ka PMKKKY ha ki bynta jong ka Sohra ki kynthup halor ka jingpynbha ïa ka jingpynpoi um shapoh circuit house, Sohra civil sub-division, kata lyngba ka pumping water supply scheme kaba thymmai na ka shyngiar kaba don marjan ba la tip kum ka Um Them Circuit kaba kot sha ka T.21,80,600 bad ka jingshna ïa ka jaka pynlang um slap na ka bynta ka circuit house, Sohra civil sub-division kaba kot sha ka T.31,65,000.
Halor ka mat kaba ïadei bad ka District Mineral Foundation (DMF) fund ïa kaba u Bah Balajied Synrem u la pan jingtip la kito ki jaka tih par kiba la shah ktah ki dei ne em kiba la shim kongsan haba pyntreikam ïa ka mang tyngka, na ka liang u CM u la ong kumba la kdew katkum ki kyndon ka jingithuh ïa ki jaka kiba shah ktah ka dei ka mat kaba hap ban khmih bniah.
U la ong ruh kumba ka kyrteng la kdew ba kane ka DMF, kane ka dei ka Trust ïa kaba la khmih ha ki kyrdan jong ki district ha kaba u Deputy Commissioner u dei u shongknor ban bishar bniah ne screening bad ban mang ne sanction ïa ki projek, bad na ka liang ka sorkar kam tuklar eiei ruh ha kaba ïadei bad kum kine ki jingjied bad ki jingpan pisa.
Une u MLA ka Shella u la buh jingkylli ruh ba hato ki MLA ki shah kynthup ne em kum ki dkhot jong ka DMF, u Conrad u la ong ba la pynmih ïa ka jingpyntip kaba thymmai da ka sorkar halor kane ka bynta ha ka 22 tarik u Nailar 2022, ha kaba ki MP bad ki MLA jong ki district ruh ki shah kynthup kum ki dkhot jong ka DMF.
Haba ïadei bad ka jingkyrpad u MLA ka AITC u Mukul Sangma uba dei ruh u Myntri Rangbah barim, halor ka jingdonkam ban don ka kaiphod ban pynthikna ka jingpynïaid beit ïa ka rukom pyntreikam ïa kane ka mang tyngka, na ka liang jong u Myntri Rangbah u la pynthikna ruh ba na ka liang ka sorkar jylla kan wan shakhmat ha ryngkat ka kaiphod ba shisien shi snem ha kaba ïadei bad ka jingpyntreikam ïa ka mang tyngka.
