Nongpoh, Nailur:
Ka jingbym don ïa ka jaka theh ñiut kaba paka ha ka thaiñ Bhoirymbong, Ri Bhoi District, ka la wanrah ïa ka jingeh shikatdei na ka bynta ban wanrah ïa ka khuid ka suba kiba mih na ki ïing ki sem jong ki paidbah bad khamtam eh ki jaboh jabaiñ kiba mih na ka ïew Bhoirymbong.
Kumba long haduh mynta, ki jaboh kiba mih na ka ïew Bhoirymbong bad ruh na ki ïing ki nongshong shnong ka thaiñ, la shu bret ha ki bynta jong ka madan Kurkalang, ka jaka ba ki paidbah kynthup naduh ki heprit, ki samla bad kiba la rangbah ruh kumjuh ki ju pyndonkam ban pynlong kum ka jaka kilan met bad ki jait jingïalehkai kiba pher bapher.
Kum shi bynta na ka jingthmu ban weng ïa kane ka jingeh kaba ki paidbah ki ïakynduh, ka Dorbar Shnong jong ka Lumdaitkhla Bhoirymbong ha ka sngi Balang, ka la pynlong da ka jingïalang ban lum ban lang ïa ki paidbah nongshong shnong ban ai jingpynshai halor ka jingdonkam ban don noh ïa ka jaka theh ñiut kaba paka, kaba long katkum kane ka juk stad mynta ïa kaba la tip ruh kum kata ka Solid Waste Management.
Ha kane ka sngi la wan ban ïadon ryngkat naduh ki samla, ki longkmie bad ki rangbah ruh kumjuh ban ïashim bynta halor katei ka mat kaba ki nongïalam shnong ki don ban pynshai, ïa ka jingdonkam ban wanrah ïa katei ka Solid Waste Management kum shi bynta ban weng ïa ka jingeh kaba ki paidbah ki ïakynduh na ka bynta ban wanrah ïa ka khuid ka suba hapoh ka shnong ka thaw bad ka thaiñ hi baroh kawei.
Nalor ki nongïalam bad ki paidbah nongshong shnong, ha kane ka sngi la wan ban ïadon ryngkat ruh da uwei u samla na ka shnong Umpling, u samla Banbhalang Diengdoh, uba la don bynta ban pyntreikam ïa ka Solid Waste Management ryngkat ka kynhun ka jong u, ban pynshai bad pynsngewthuh sha ki paidbah halor kane ka rukom bret ïa ki ñiut ki ñier kaba la leh katkum ka juk stad bad ka bym don jingktah ïa ka koit ka khiah jong ki paidbah ne ïa ka mei mariang ruh kumjuh.
Ki nongïalam shnong ka Lumdaitkhla Bhoirymbong ba kynthup naduh u Rangbah Shnong, Bah S.T Rympei, General Secretary Bah Reading Rymbai, Chairman Bah S Lamare haba kren ha kane ka sngi, ki la ïathuh ba ka shnong, ka la dep ban thied ïa ka jaka na ka bynta ban wanrah ïa ka skhim Solid Waste Management hapoh u pud u sam jong ka shnong bad ki la ïoh ruh ïa ka jingïarap na ka Khasi Hills Autonomous District Council (KHADC) ban ker kynroh shwa ïa katei ka jaka.
Ki la pyntip ruh ba ka jingthmu ba kongsan jong ka jingpynlong ïa kane ka jingïalang paidbah ka dei hadien ba bun na ki ‘riew paidbah, ki la shah pynsngewthuh bakla halor katei ka phang kaba buh jingeh shikatdei ïa ki kum ki nongïalam shnong bad dei halor kane ka nongrim ba la pynlong ïa ka jingïalang ban pynshai sha ki paidbah ba katei ka jingthmu ka long ban wanrah ïa ka khuid ka suba hapoh ka shnong ka thaw, bad ruh ba kam don satia kano kano ka jingktah ïa ka koit ka khiah lane ïa ka mei mariang ruh lyngba ka jingpyntreikam ïa ka Solid Waste Management.
Kumba ka la don ka jingmih ha ki lad pathai khubor lyngba ka shnong Lumsohpieng, ki nongïalam ka shnong Lumdaitkhla Bhoirymbong, ki la pynshai ruh ba katei ka jaka kaba la thmu ban buh ïa ka Solid Waste Management ka dei kaba dang hap pura hapoh u pud u sam jong ka shnong Lumdaitkhla Bhoirymbong, bad ym ha ka shnong Lumsohpieng.
