Shillong, Jylliew 21
U Symbud Myntri Rangbah u ba khmih ruh ïa tnad Transport u Bah Sniawbhalang Dhar u la ïathuh ba ki nongïalam jong ki nongkamai arshaka (bike taxi) ki la pynkynmaw ïa u halor k a jingdawa jongki ba kin ïoh ïa ka jingithuh da ka aiñ ba kin kamai, ïa kaba ka Sorkar ka la kular ba shen kan sa leh ïa kaba donkam.
U la ïathuh ba ka Sorkar ka la pdiang ïa ki jingdawa jongki bad ka tnad Transport ka dang pynkhreh ha kine ki 5 haduh 10 sngi ïa ki jingdonkam na ka bynta ka jingdawa jongki kaba ki kwah ïa ka Permit shimet (Single Permit) ban ïoh kamai, “Shwa ban ai ïa ki laisen, ka tnad kan khot biang ïa ka jingïalang ha kaba yn sa bishar bad pynbeit ïa ka khajna ne tax kaba ki dei ban siew bad kumjuh ïa ka dor bai kali (fare) kaba ka Sorkar ka dei ban buh” la ong u Bah Sniawbhalang.
U Bah Sniawbhalang u la kdew ba ïa ka dor ka Sorkar ka hap ban buh hi namar ka dei ka Sorkar kaba ai laisen bad ym lah ban ai lad ba kin buh dor kataba mon namar ïoh ka ktah ïa ki paidbah bad ïa kane baroh yn sa ïakren bha halor ki kyndon shwa ban pyllait ïa ki laisen.
U la ong ba ka Sorkar ka ai lad ïa baroh kiba kwah ban kamai, la ki dei ki kompani ne ki riew shimet, hynrei ki dei ban pynbiang lut ïa ki kot ki sla baroh bad ka tnad kan sa peitngor bha ba ki kali ki dei ban biang nadong shadong.
Kane ka jingkren u Bah Sniawbhalang ka wan hadien ba ka kynhun ki nongniah arshaka hapoh ka lama ka “Ride to Serve Shillong” ha ka sngi Thohdieng ki la leit ïakynduh ïa u ban pynkynmaw ïa ka jingdawa jong ki ban ïoh ïa ka Permit shimet.
Haba ïadei kane, u Bah Kyntiewdor Nongkynrih u ba dei u Convener ka Ride to Serve Shillong, u la ïathuh ba u Bah Sñiawbhalang Dhar u la kular ban khot ïa ka jingïalang hapdeng ka kynhun bad ka Sorkar ha kine ki sngi ban ïamir jingmut halor kane ka mat bad u la pynpaw ba ka kynhun ka khmih lynti ba kane ka kam kan urlong noh hapoh ka taïew ban wan.
