Shillong, Jylliew 21
U Myntri Rangbah ka Jylla, u Conrad K. Sangma ha ka Sngi Saitjaiñ u la ong ba ka Meghalaya ka la pynkylla ïa ka rukom treikam jong ki Externally Aided Project (EAP), ha kaba ki trai shnong ba la pyntbit mynta ki pynïaid ïa kiba bun na ki kam ‘Consultancy’.
Haba kren sha ki lad pathai khubor hadien ba kut ka ‘Seminar’ ba ar sngi halor ka phang, “Leveraging Externally Aided Projects in the North East”, u Sangma u la ong ka jingpynroi ïa ka bor treikam ha kine ki shiphew snem ba la dep ka la pynduna shi kat dei ïa ka jinshaniah ha ki ‘riewshemphang kiba na shabar.
“Ha kaba sdang, ngi hap ban wanrah ïa ki na shabar, hynrei jan 90% mynta ki dei ki briew na ka Jylla. Ki dei kiba la ïoh jinghikai bad mynta bun ki briew kiba trei ha kine ki EAP lait noh katto-katne ki kyndan ba kongsan, kiba bun hi ki dei ki trai shnong,” ong u Myntri Rangbah.
U la ai burom ïa ka jingwan jong ki projek sha ka Jylla sha ka jingbei tyngka ba khlem sangeh jong ka Sorkar Pdeng ha ka Thaiñ Shatei Lam Mihngi ha kine ki 12 snem ba la dep.
“Lada ngi la ïohi shisha ïa kano-kano ka jingbei tyngka bad ka roi ka par kaba shisha, ka la jia tang ha kine ki 12 snem ba la leit. Ka dei tad hadien ba la shimti u Myntri Rangbahduh, u Narendra Modi ha kaba ka la don ka jingpynleit jingmut kaba kyrpang ïa ka Thaiñ Shatei Lam Mihngi ka bym pat ju jia mynno-mynno ruh,” ong u Sangma.
U Myntri Rangbah u la batai ba ki skhim kum ka SASCI bad EAP ki dei kiba ïasoh bad ki jingkylla bad kiba hap ïaid katkum ka rukom long ka pyrthei.
“Ka SASCI ka wan ryngkat bad ki jingpynkylla kiba phi hap ban leh. Phim lah ban shu ïoh ïa ka pisa tang namarba phi pan ïa ka. Phi hap ban pynshisha ba phi dei hok ban ïoh ïa kata ka pisa,” u la ong.
Shuh shuh u Sangma u la bynrap ba ka jinghikai ïa ki nongshong shnong ban pynïahap bad ki kyrdan jong ka pyrthei ba la buh da ki ‘agency’ bapher-bapher ka long kaba kongsan eh.
“Kata keiñ kaba ka Myntri ka la kdew ba ngi donkam ïa ki ‘riewshemphang, ngi donkam ïa ka jingtbit ban wan rung bad pynbha ïa ka, bad dei hangta ba ki kam jong ki ‘Consultant’ ki wan rung,” u la ong haba kdew sha ka Myntri tnad pla tyngka ka Sorkar Pdeng ka Nirmala Sitharaman kaba la don lang ha ka jingïakynduh bad ki nongthoh khubor.
U Myntri Rangbah u la ong ba kane ka jingtbit jong ka thaiñ kan ïarap ïa ka Meghalaya ban pyndonkam kham bha ïa ki skhim ka Sorkar Pdeng bad ban pyntreikam ïa ki projek ha ryngkat ka jingtreikam kaba paka ban ïaid shakhmat.
