Shillong, Jylliew 21
Kawei ka longkmie Khasi kaba la tip kyrteng kum ka Kong Dala Phanbuh ka la riam da ka sem ‘dhara’ haba ka leit peit ïa ka jingïalehkai phutbol FIFA World Cup 2026 kaba dang ïaid mynta ha ki lai tylli ki ri kata ka United State of America, Mexico bad Canada.
Kane ka jingpaw pyrthei ba kane ka longkmie ka la riam da ka sem ‘dhara’ ka dei hadien ba la ïohi ha ‘social media’ haba ka leit peit phutbol ha ka por ba ïalehkai ka England pyrshah ïa ka Croatia mynha ka 17 tarik mynta u bnai.
Haba U Nongsaiñ Hima u la ïoh ban ïakren lyngba ka ‘whatapp’, ka Kong Dala ka la pynpaw ka jingsngewkmen ban ïoh riam da ka dhara kaba la rah kyrpang na Shillong ban leit peit phutbol World Cup.
Ka la ïathuh ba bun bha ki briew na kiwei ki ri ki la ai jingïaroh haba ka riam da ka dhara namar ka long shongkun bha.
Shuh shuh ka la ïathuh ba ka ju sem haba leit peit phutbol world cup bad ha ka por leit jingïaseng Khristmas.
Ka Kong Dala ka la pynpaw ka jingsngewkmen namar ha ka por ba poi ka phutbol World Cup 2022 ha Qatar, u lok u trei ha katei ka ri bad mynta haba la shah pynkynriah sha America ka phutbol ka poi sha America.
“Kumba haïing ki kyrshan ïa ka England, nga ruh bad u kurim ha madan phutbol ngi ïa kyrshan lang ïa ka England haduh ba kan da jop,” ka la ong.
Ka la pynpaw ba kam poi pyrkhat ba naduh dangrit ki shu peit tang na ka television hynrei mynta ban ïohi markhmat ïa ki rangïalehkai ha madan bad ïa ki paidbah kiba risa bad kynhoi haba ka ri ba ki kyrshan ki ïoh thep kol.
Shuh shuh ka la ïathuh ba ha America ruh ki bun bha ki paidbah kiba kyrshan ïa u Lionel Messi u rangïalehkai uba tbit jong ka Argentina.
“Nga la ïohi da la ki jong ki khmat ba ki nongkyrshan jong ka ri Argentina haba ki wan peit phutbol ha Qatar ki da mane shisha ïa u Messi khamtam lei haba u la wanrah ïa ka ri sha ka jingjop,” ka la ong.
Ka la ïathuh ba ki ïoh jingtip ba ki don ki Khasi kiba sah ha America tangba kam pat ïakynduh namar ki ïasah jngai.
