Shillong, Jylliew 21
Ka samla Daiaphi Lamare, kaba long kawei na ki samla ka Jylla kaba la paw nam hapoh ka Ri bad ïa kaba la tip paidbah baroh ka ri India kum ka Rebel, ka la kyntu ïa ki samla ka Jylla haba ki don ka sap ban rwai ki dei ban don ka jingsngewskhem halade.
Ka la pynpaw ïa kane haba jubab ïa ka jingkylli kaba la buh da u Myntri Rangbah ka Jylla u Conrad K Sangma haba u la ïeng ha rynsan ban buh jingkylli kum uwei napdeng ki nongkyrshan jong ka haba ka la paw kum ka nongrwai kaba tbit ha ka rwai ‘Rap’ bad kaba la ïadon bynta ruh ban rwai ha ka phlim Dhurandhar, ka phlim kaba la ïashim bynta da u Ranveer Singh, kaba long kawei na ki phlim kaba ïaid ïew bha bad kaba la knieh lut ïa baroh ki phlim Hindi lada ïanujor bad kiwei ki phlim haba pyni ha ki cinema.
Kane ka jingjubab ka Rebel ka dei haba ka wan kum ka nongshah khot sngewbha ban ai jingkren ha ka prokram rakhe ïa ka ‘World Music Day’ kaba la pynlong ha ka 20 tarik Jylliew 2026 ha madan Polo bad ruh ban sam khusnam sha ki samla donsap kiba rwai bad tem bad kiba pynmih jingrwai durkhih.
Ha kane ka prokram u Conrad K Sangma u la long kum u kongsan ban sam khusnam sha ki nongïoh khusnam, kata ha ka kyrdan best folk, best pop, best Hip-hop, best gospel, best collaboration, best music video, best original soundtrack, best inspiration song, best rock artist non HM, best independent artist of the year, best MGMP artist non HM, best female artist, best male artist, emerging artist of the year, song of the year.
Napdeng ki jingrwai baroh, ka jingrwai Shit Kyrang kaba dei na ka phlim Tyngkai ba la rwai da u Ram Suchiang bad Eibyntamiki Tang ba la ak da u Phira Dohtdong bad Sherilin Khongwar ka la ïoh rah ïa ka nam best song of the year jong u snem 2025.
Ka Rebel ka la ong ruh ba ki bun bha ki samla kiba don sap hapoh ka jylla hynrei ka dei beit ïa ka jingtrei shitom kumta donkam ban mih pyrthei ba phin tip ïa ka sap lajong.
Katba u Conrad K Sangma u la ong ba ka Sorkar Jylla ka la pynkhreh ban shna ïa ka film city bad film institute ha Shillong.
Ha kane ka sngi la wan ban pynshongshit ïa ka prokram da ka jingrwai ki Kid Tarari Choir, ka jingshad na u Steve Jyrwa, ka jingrwai na ka Khmih Creative society, Bending Wave Band.
Ka Yoga ka long kum ka ‘Science’ ba pynïasoh ïa ki briew bad ka mynsiem jong ki: Rajnath
Shillong, Jylliew 21
U Myntri ka Tnad kam ïada ri u Rajnath Singh u la ïalam ïa ki shipai ïada ri bad ka Tnad kam ïada ri ha ka jingrakhe ïa ka International Day of Yoga (IDY) kaba 12 da kaba leh ïa ki asana & rukom pynhiar bad ring mynsiem ryngkat bad kumba 1,000 ngut ki shipai jong ka Indian Air Force bad Indian Army ha Eastern Air Command Headquarters ha Shillong, Meghalaya ha ka 21 tarik Jylliew, 2026.
Ha kane ka sngi u Myntri Rangbah ka Meghalaya u Conrad K Sangma, u Chief jong ka Air Staff Air Chief Marshal AP Singh, u Air Officer Commanding-in-Chief, Eastern Air Command Air Marshal Inderpal Singh Walia, bad u General Officer Commanding jong ki Headquarters 101 Area Lieutenant General Mohit Wadhwa ki la leh Yoga ruh bad u Myntri kam ïada ri.
Haba ai jingkren sha ki lad pathai khubor ha kane ka sngi, u Rajnath Singh u la batai ïa ka Yoga kum ka science ba pura bad ka rukom im kaba pynïasoh ïa ki briew bad ka mynsiem jong ki, ka imlang sahlang, ka mariang bad ka jinglong blei. U la bynrap ba ka yoga ka ai ka lynti sha ka jingsuk ka mynsiem, ka jingshai ha ka jingmut jingpyrkhat, bad ka jingskhem jingmut.
Ha ka post ha ka X, u Myntri kam ïada ri u la ai khublei ïa ki sienjam ba ïaineh bad ka jingïalam ba iohi jngai jong u Myntri Rangbahduh ka ri u Narendra Modi ban pynlong ïa ka Yoga kum ka jingïakhih ha ka pyrthei, kaba ai jingmyntoi ïa ka koit ka khiah ïa ki briew ha kylleng ka pyrthei. U la ban jur ba ka Yoga ka pyni ïa ka bor jong ki riti dustur hyndai jong ka India, kaba pynthikna ïa ka bha ka miat jong baroh ki briew.
U la kyrpad ïa ki paidbah ban pynlong ïa ka Yoga kum ka bynta kaba kongsan ha ka jingim jong ki kaba man ka sngi ban tei ïa ka met kaba koit ba khiah, ka jingmut jingpyrkhat kaba jai jai, bad ka ri kaba khlain.
