Shillong, Jylliew 21
U Myntri ka tnad kam ïada ri ka Sorkar Pdeng, u Rajnath Singh u la pyntikna ïa ki nongïalam ka BJP Meghalaya ba ïa ki jingeh kiba la pynpaw ha kaba ïadei bad ka jingpynkynriah ïa kiba shong ba sah (Dalit Sikh) ha Them Ïew Mawlong bad ïa ki kam jaka bym pat lah pynbeit ha Shillong Cantonment yn sa shimkhia khnang ban pynbeit noh kloi ïa ki.
Ka kynhun ba la ïalam da u State President ka BJP, u Rikman Momin, ha ryngkat ka jingsynran lang ki District President na East Khasi Hills bad Ri-Bhoi, ka la ïakynduh ïa u Singh ha ka jingwan jngoh jong u sha Shillong bad kdew ïa ki mat kiba dang sahteng la bun-bun snem.
U Momin u la pynsngew ha u Myntri ba ka jingïapynbeit ha ka rukom kaba suk ba saiñ halor ka Them Ïew Mawlong ka long kaba donkam eh na ka bynta ka jingïatylli bad ka jingsuk ha ka imlang-sahlang ha ka Jylla bad yn sa khmih bha ïa ka haba phai sha ka jingdon bynta jong ka Sorkar Pdeng bad ki jaidbynriew ‘riewlum.
Ka President ka East Khasi Hills District, Kong Priambada Blah ka la ong ba ka Jylla ka la ïaid shakhmat na ka bynta ka lad jingpynbeit, bad ba ka jingshim rai mynta kan pynskhem ïa ka jingshaniah hapdeng ki paid Khasi-Jaiñtia.
Ka la pynpaw ruh ka jingkyrmen ba ïa kane ka kam yn sa lah ban pynbeit ha ka ka samoi treikam ba mynta jong u Myntri Rangbahduh ka ri, u Narendra Modi.
Ka kynhun ka la pynpaw ruh ïa ka jingpynslem ha ka liang ka jingpynïaid kam ha Shillong Cantonment.
Na ka liang u State Vice-President, u Bipen Pradhan u la kyntu ïa ka tnad ban pyntreikam ïa ki ‘Building Bye-Law’ bad ban pynbeit ïa ka polisi khyndew bathymmai kaba la sahteng naduh u snem 2017.
Katkum ka jingong jong u, ka polisi ba shipor hapoh ka STR ka la pynkiew ïa ka bai wai jaka na ka bynta ki nongshong shnong da haduh 1,000 shah, bad ka jingnang pynslem ïa ka, ka lah buh jingeh shuh-shuh ha ka liang ka aiñ.
U President ka Shillong City, u Bah Bob Lyngdoh, u la kyrpad ïa ka jingbit na ka bynta ka jaka ïada kaba donkam ban pynheh ïa ka surok na Barik Point sha Jhalupara, da kaba ong ba ka long kaba donkam eh na ka bynta ban pynduna ïa ka jingkhapngiah – kawei na ka bynta ba kongsan jong ka nongbah.
Haba sngap ïa ki jingai jingmut, u Singh u la ong ba ka tnad kan sa khmih bniah ïa kawei-pa-kawei ka mat bad kan ïatreilang bad ki bor ba dei peit ban wad ïa ki lad ki lynti khnang ban pynbeit noh kloi ïa kine.
