Nongstoiñ, Jylliew 21
Ka jingbym pat lah jong ka Sorkar Jylla ban pyndep noh ïa ka jingpynbeit ïa u pud u sam hapdeng ka Jylla Meghalaya bad Assam ha ki bynta jong ka Langpih Sector kala pynlong ym tang ïa ki kynhun sengbhalang, ki nongïalam shnong lane ka Hima jong katei ka thaiñ ba kin pynpaw ïa ka jingsngewkhia hynrei kala pynlong ruh wat ïa ki riew rangbah ba kin hap ban kren ha ki rynsan kren paidbah ban pynsngew paidbah namar ka jingthrang ka jong ki ban pyndep noh ïa kane ka kam.
“Katno sien ki la pynlong ïa ki jingïalang ha Langpih bad ngi kynmaw ba ngi leit ha ka jingïalang ba wan u Myntri Rangbah u Conrad K Sangma hynrei phawse haduh mynta ka pynlong ïa ngi ki paidbah tang ban leit peit Helicopter, jar jar khlem mih eiei,” ong u Bah Shaphrang Lyngdoh uwei na ki dkhot jong ka Joint Action Committee Ri Mulliang C&RD Block haba kren ha ka jingïalang ban pynpaw ïa ka jingpyrshah ban rah ïa ka ophis jong ka Ri Mulliang Block na Nonglang sha Tynghor kaba la long dang shen.
U Bah Shaphrang u la ong ruh ba kane ka jingdawa ïa u pud u sam ka kylla long tang ka mat sain pyrthei (politics).
U Bah Shaphrang u la pynpaw ruh da kaba ong, “Ngi dawa ïa ka Sorkar ba kan pynbeit kloi kumba la kular ïa u pud u sam khnang ba kan long jingshong shngaiñ bad khnang ba kan long ka jingsuk, ka rep ka riang ka jong ngi ym ba ngin rep ngin riang bad ngin tei ki ïing tei sem ha ka jingsyier.”
Shuh shuh u la ïathuh bad pynpaw ruh ba ki paidbah ki hap ban buhrieh ïa ka spah jong ka dong ka thaiñ namar ki tieng ba ym don ka nongrim ïalade hangno ki don.
