Shillong, Nailur 22
Ki don kumba 124 tylli ki ‘consultant’ lane ki nongïarap ban pynïaid kam ïa ka Sorkar Jylla bad kine ki dei kiba hap ban don beit katkum ki kyndon na ka bynta ki skhim ka Sorkar Pdeng bad ki projek kam pynroi hapoh ka Externally Aided Project (EAP).
Ka jinglut na ka bynta kine ki ‘consultant’ ka long T.22.56 klur, bad katkum ka jubab kaba la ai da u Myntri Rangbah u Conrad K Sangma ha Ïingdorbar Thawaiñ ha ka sngi bakut ka dorbar synrai ha ka sngi Thohdieng, kine ki ‘consultant’ kim shim pisa na ka Sorkar Jylla, hynrei ka pisa ka la wan lypa ha ka por ba mang ïa ki projek.
U Myntri Rangbah u la jubab ïa kane halor ka jingkylli kaba la wanrah da ka MLA ka AITC na Ampati, ka Miani D Shira.
U la ong ba ki consultant kiba la thung beit tang na ka bynta ki projek kiba hap hapoh ka EAP ki don 59 tylli.
Kine ki consultant ki dei kiba don ka jingtip jingshemphang ha kiba bun ki kam bad la wanrah ïa ki katkum ki kam kiba shah ha kaba la pyndonkam ïa ki kyrpang na ka bynta ki projek kiba wan na ka Sorkar Pdeng (centrally sponsored schemes) bad EAP.
U la ong ba ha baroh ar tylli kine ki projek, la donkam beit ïa ki consultant katkum ki kyndon bad ki don ki khep ba la pyndonkam lang da ki tnat treikam ka Sorkar Jylla ïa kine ki consultant.
Ka jingjied ïa kine ki consultant ka long katkum ka tender kaba la pynshong nongrim katkum ka jingtbit jong ki.
U Myntri Rangbah u la batai ba ka jingdon kine ki briew kiba la don ka jingtip bad shemphang ka ïarap ruh ïa ki briew ka Jylla kiba trei ha ki tnat bapher bapher ban ïoh ïa ka jingnang jingtip ha ka rukom treikam. Kumta u la ong ba ka pynmyntoi ruh ïa ki briew ka Jylla namar ki ïoh ban treilang bad ki ïoh ruh ki jinghikai bad tip ïa ka rukom treikam.
U la ai nuksa ruh ïa ki projek hapoh ka Shillong Smart City ha kaba ka Jylla ka donkam beit ïa ki briew kiba tip bad shemphang bad napdeng ki 3 tylli ki Jylla ha ka ri, ka Meghalaya ka donlang ha ryngkat kine 3 tylli ha kaba la lah ban pyndep ïa ki kam ban pynkhreh ïa ki projek bad la ïoh ïa ka mang pisa kaba long T.130 klur.
Halor ka jingkylli u MLA ka Mawryngkneng u Bah Heaving Stone Kharpran, katno tylli ki consultant ki dei nabar bad katno tylli na Jylla, u Myntri Rangbah u la ong ba na kine, ki don 26 tylli ki consultant na Jylla katba kiwei pat ki dei kiba donbynta ha ki kam hapoh ka ri bad shabar ri ruh kumjuh.
Halor ka jingkylli u MLA ka Mylliem, u Bah Ronnie V Lyngdoh ban pyndonkam lang ïa ki ophisar ka Jylla kum ka jingpynkupbor ïa ki haba pynkhreh ïa ki DPR bad kiwei kiwei ki kam, u Myntri Rangbah u la ong ba ki don ki kam kiba kham eh kiba ym lah da ki briew ka Jylla bad kino kino ki kam kiba lah ban leh da ki briew lajong la pynïaid shakhmat, bad ïa ki kam la leh lang da ka jingdonbynta ki ophisar ka Jylla.
U la ai nuksa ruh ïa ki projek kum ka cable car, glass bridge ha Mawkdok kiba donkam ïa ki consultant nalor ki kam kiba ïadei bad ka mariang bad ka jingwanrah ïa ki tiar kiba dei ban pyndonkam ha ki projek.
Na ka liang u MLA ka Congress u Saleng Sangma u la ong ba ki don ruh ki karikor (engineer) ka Jylla kiba khlem ïoh kam bad ka Sorkar ka dei ban pyndonkam ïa ki ruh ba kin ïoh jingtip bad jingshemphang ban long kita ki karikor kiba tbit.
U Conrad u la ong ba ïa kane ruh yn sa peit ban pyndonkam lang da ki consultant.
