![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Shillong, Nailur 22
Ka Sorkar Jylla ka la pynkhreh ban mang pisa lang noh na ka skhim kaba dei ka bhah ki MLA khnang ba ki MLA ruh kin ïoh ban mang jingïarap lem sha kito ki longïing kiba shahktah haba jia kino kino ki jingshah lynshop kynthup ki jinglynshop na ki bor ka mariang.
Ïa kane la ïathuh da u Myntri Rangbah ka Jylla u Conrad K Sangma ha ka kynta kylli jingkylli ha ka sngi bakut ka dorbar synrai haba jubab ïa ka jingkylli jong u MLA ka Congress na Umsning konstitwensi, u Dr Celestine Lyngdoh ha ka sngi Thohdieng.
Haba wanrah ïa kane ka jingkylli, une u MLA ka Umsning u la ong ba man ba jia ki jingshah lynshop la ka dei ba bamduh ka ding ïa ka ïing ne jingshah pynjulor ki jingdon jingem, kiba nyngkong eh ban ïohpdiang ïa ka jingud jingnam ki dei ki MLA lane MDC.
Kumta u Dr Celestine u la ai jingmut ïa ka Sorkar ba ka dei ban thawlad ban mang noh teng ïa ka pisa na ka bhah kaba la mang ïa ki MLA, kata ka SRPW/SUWP, namar lada ap ban ïoh jingïarap na ka Sorkar lyngba ka ophis DC lane BDO ka kham shimpor bad na ka bynta kito ki longïing kiba la shah pynjulor lut ka ïing kam lah ban long ba wat hadien shisnem kim pat ïoh ïing ban sah.
Na ka liang u Myntri Rangbah uba la ïeng ban bynrap ïa ka jubab u Bah Kyrmen Shylla uba dei u Myntri ba dei khmih ïa ka tnat Disaster Management, u la ong ba dang shen ha ka jingïalang jong ka MDA, uwei na ki Myntri Sorkar ruh u la wanrah ka jingai jingmut kaba kum kane kumba ai jingmut u MLA ka Umsning.
U la ong ba ka Sorkar kan sa peit bniah ïa kane ban pynkylla ïa ka kyndon jong ka MLA skhim ha kaba yn lah ban mang katto katne ka pisa na kane ka skhim kumba la leh ha ka por COVID-19 ha kaba la mang pisa lyngba ki MLA ban ïarap ïa ki longïing kiba mad jingeh bad ban ïarap ïa ki paidbah.
“Ngi la pyrkhat bad dang pynkhreh ïa kane kham kloi katba lah, namar ngin nym lah ban mang lyngba ka Contingency Fund hynrei ngi lah ban pynkylla ïa ka kyndon jong ka SRWP/SUWP,” la ong u Myntri Rangbah.
Na ka liang u MLA ka Congress u Saleng A Sangma u la kylli la ka Sorkar kan dang pynkiew biang ne em ïa ka skhim SRWP/SUWP na kaba mynta kaba dei T.2.5 klur, hynrei na ka liang u Myntri Rangbah u la ong ba ïa mynta ym pat lah ban leh ïa kata, namar dang shu dep pynkiew shen bad donkam ban peit ïa ka jinglong jingman ka pla tyngka bad jingmih jong ka Jylla.
Kham hashwa u Myntri Bah Kyrmen Shylla u la jubab ïa ka jingkylli jong u MLA ka Mawryngkneng u Bah Heaving Kharpran halor ka jingbym pat ïohpdiang jong 2 tylli ki longïing ïa ka jingïarap namar ka jinglynshop ha ka jingpluh jong ka ïing.
Hynrei u Bah Kyrmen Shylla u la ong ba baroh 2 tylli ki longïing la dep phah ïa ka pisa ha kaba kawei ka longïing ka ïoh T.1.35 lak katkum ka kyndon hapoh ka SDRF bad la phah lyngba ka Public Financial Management System (PFMS).