Shillong, Naitung 24
Ka Confederation of Meghalaya Students Organization (CoMSO) Khasi Jaiñtia Hills, ka ong ba ka jingïaumsnam kan long para trai ri trai muluk, katba uba ïohnong pat dei da u nongwei, haba pynlong ïa ka jingpynsngewthuh paidbah ne ka Public Hearing.
Ïa kane la pynpaw da u Chairman ka CoMSO, u Bah Roy Kupar Synrem hadien ba ki la pynlong ïa ka jingïalang ba kyrkieh ha Earle Holiday Home, ban ïakren halor ka jingthmu ka Meghalaya State Pollution Control Board (MSPCB) ban pynlong ïa ka jingpynsngew paidbah lane ka Public Hearing ha Daistong, Elaka Nongkhlieh, halor ka jingthmu ka Shree Cement Ltd ban khlong ïa u Mawshun.
Haba kren sha ki lad pathai khubor, u Bah Roy Kupar Synrem, Chairman, ka kynhun u la ong, ba ka jingwan jong katei ka projek ka la wanrah ïa ka kynrum kynram hapdeng ki nongshong shnong, namar ba ka jingbym ïaid beit ïaid ryntih.
U la ong ba ka Organisation ka la ïoh jingtip, ba kan don biang ka jingpynsngew paidbah ha ka 31 tarik Naitung, 2026, hynrei kaba sngewsih pat ka long, ba ki trai jaka kim shym la tip ei-ei halor kane namar ïa ka jaka jong ki ruh la pyrshang ban shu klun jubor.
“Ka sorkar kadei ban pynbeit shuwa ïa kane hashwa ban pynlong ïa ka jingïalang, namar haba khatduh ka jingïaumsnam ka long hapdeng ki trai muluk, katba ka jingïohnong pat kan long ïa u bar jylla,” u la ong.
U la ong, ba ïa kane ka Public Hearing, la thmu ban pynlong ha ka por 8 baje mynstep shaneng, kaba mut ba kane ka lah ban don kaei-kaei sha lyndet, ïa kaba ngim lah ban tip halor ka jingthmu ban pynlong ïa kane ka Public Hearing. U la buh jingkylli, ba balei ki bor ba halor ki buh ïa kane ka Public Hearing ha ka por 8 baje shaneng bad kiba don ha ka shuki, ki lah ban tip kaei kaba don sha lyndet.
“Ki briew jong ka thaiñ, ki don ka jingsngewkhia haba kane ka projek ka wan, kaba nyngkong ki don ki nongrep, kiba la rep da ki phew snem ha u Lum Syrman, bad watla ki nongrep kim tip mano ba la thied ïa katei ka jaka, hynrei ki la thoh sha ka Sorkar Jylla, ba shuwa ban ïaid ki Public Hearing ban tih mawshun, dei ban pynbeit shuwa ïa ki jingeh, kiba ki nongrep ki ïakynduh bad ki trai jaka ki ïakynduh. Ïa kine baroh ka Sorkar kam shym la pynbeit,” la ong u Bah Roy Kupar.
U la ong ba ka kynhun ka phah ka khubor kaba shai sha ka Sorkar ba “Ym dei ban ïaid shakhmat ïa kane ka kam, tad haduh ban da pynbeit bad ban pynïoh ïa ka hok, khamtam eh ki trai jaka, ki nongrep kiba shah ktah nyngkong lyngba kane ka projek”. U la bynrap “Hooid, ngi donkam ïa ka roi ka par, hynrei nyngkong ngi dei ban donkam pat shuwa ïa ka jingbha jingmiat ki briew lajong”.
Haba kylli, u la ong ba ka Sorkar kadei ban pynbeit shuwa ïa ka jingud jingnam ki trai jaka, shuwa ban leit sha ka public hearing, namar ka public hearing kam don bynta bad ka jinglong trai ïa ka jaka.
Haba bynrap, na ka liang u Bah Sambormi Lyngdoh, President ka JNC, u la ong ba ka JHADC, kan hap ban shimkhia halor ka jingai NOC, da kaba kdew ba u CEM u ong ba ïa kane ka kam, la aiti ha ki nongsynshar shnong katba ka jingshisha pat ka long, ba kino-kino kiba ai ïa ka NOC kin hap ban ïohbor na ka JHADC.
Nalor kata, u la ong ruh ba ka jingdon jong ki kompani, kam ai kano-kano ruh ka jingmyntoi ïa ki nongshong shnong.
“Katba ka seng ka dang ïai pyrshah bad ki trai jaka ban ïakhun ïa ka hok jong ki trai jaka, ki nongrep bad ngi la lah ruh ban pynsangeh ïa ka Public Hearing shuwa kane, hynrei kumba ïuh tdong bseiñ, ba hapdeng ka jingïakhih ban dawa ïa ka hok, ka ophis u DC ka EJH ryngkat ka Pollution Board ki la pynbna sa kawei pat ka Public Hearing,” u la ong.
Kumta ngin dang ïai ïakhun bad ngin ïai ïaleh, katba ki trai jaka bad ki nongrep kim pat ïoh ïa ka hok jong ki.
