Shillong, Naitung 24
Ka Voice of the People Party (VPP) State Youth Wing hapoh ka jingïalam u Bah Marbud Dkhar, President ha ka jingsynran lang u Finance Secre -tary, Samla Riborlin Shylla, Executive Mem-ber, Samla David Umwi, u Samla Wallamkupar Nongsiej, ha ka sngi Thohdieng jong ka taïew, ki la leit sha Nongbah Delhi, ha Jantar Mantar, ban leit ai ka jingkyrshan met bad mynsiem ïa ki samla kiba dangbteng ban ïakhih.
Lah ban kdew ba kane ka jingïakhih jong ki samla pule ha Delhi, kadei ban dawa phah hiar shuki ïa u Myntri ba khmih ïa ka tnad pule puthi ka Sorkar Pdeng, kata u Dharmendra Pradhan halor ka jinglait tuh ki jingkylli examin NEET.
Katkum ki durkhih ba la phah da ka VPP, la sakhi ba ki samla ha Nongbah Delhi, ki dang bteng ban ïakhih bad ka jingïalum kaba la poi da ki lak ngut ha katei ka jaka ïakhih.
Ka jingbteng ka jingïakhih ki samla pule ha kine ki sngi, kadei namar ba ka Sorkar Pdeng, kam shym la pat ai kano-kano ka jubab ban pynhiar shuki noh ïa u Myntri ka tnad pule puthi.
Haba kren ha kane ka sngi leit kyrshan ïa ki samla pule ha Delhi, u Bah Marbud u la ong, ba katkum ka jingïoh jingtip, ka Sorkar kan khot ban ïakren bad ki nongïalam kiba pynïaid ïa katei ka jingïakhih bad ong ba yn sa ïa peit kaei ka jingmih na ka jingïakren.
U la ong ba na ka liang ka seng ka la mih shakhmat ban ai ka jingkyrshan ïa ki samla bad ong “Kane ka jingïakhih ruh kam shong nongrim tang na ka bynta ki samla pule, hynrei ka long ruh na ka bynta ki kmie ki kpa kiba don ka jingsngewkhia, ha kaba ïadei bad ka pule puthi na ka bynta ki khun”.
Ha kane ka sngi ki nongïalam ka VPP SYW, ki la ïoh ruh ka lad ban ïakynduh ïa u nongseng ka Cockroach Janta Party (CJP), u Abhijeet Dipke ha ka jaka ba pynlong jingïakhih bad ban pynpaw ban ai ka jingkyrshan bapura na ka bynta kane ka jingïakhih.
“Ka jingwan ka VPP sha Jantar Mantar, ka long ban ai ka jingkyrshan ïa ka jingïakhih ki samla pule, kaba la neh mynta la katto-katne sngi eiei,” la ong u Bah Marbud.
Nalorkata, u la ong ruh ba ka VPP SYW ka pynrem jur ïa ki pulit ka Nongbah Delhi, kiba la bom pathar ïa ki samla pule kiba ïakhih ïa ka hok, da kaba bynrap “Hato kim don hok seh ban ïakhih ha ka lynti kaba jai jai. Kumta ngin ai ka jingkyrshan kaba pura na ka bynta kine ki samla ba ïakhih ha Nongbah Delhi”.
