Shillong, Naitung 24
Katto katne sngi hadien ba ki nongrep kubi ki la sam ei ïa ki mar-rep jong ki sha ki paidbah ha nongbah Shillong na ka daw ka jinghiar dor shaba palat, u Deputy Commissioner ka East Khasi Hills District u la khot ïakren ïa ki nongïalam ka Hills Farmers Union ban sngewthuh ïa ki jingeh jong ki paidbah nongrep.
Ha jingïalang ba la khot u DC ka EKH u Abhilash Baranwal kaba la long ha ophis treikam jong u ha ka 24 tarik Naitung ki nongïalam ka HFU ha ka jingïalam u Bah Commander Shang-pliang kum u President ryngkat u Bah Allfond-birth Kharsyntiew kum u Secretary lem ki dkhot ki la wan ban ïashimbynta.
Haba kren sha ki nongthoh khubor u Bah Commander u la ïathuh ba ka Union ka la ai jingmut ïa u DC ban peit ïa ka dor ka mur ha ka ïadie ïathied ki nongrep ha ïew lyngba ka Price Monitoring Committee bad ba un kren sha ki bor ba halor ba ki nongrep kim dei ban shah khñiot dor than.
Shuh-shuh u la pynpaw ba ka Union ka kwah ba u DC un sngewthuh haei kane ka dor ka ïapher, “Hooid ngi sngewthuh ki don bun ki Dalal, hynrei watla kata ruh ngi kwah ba u DC un sngewthuh ïa kane khnang ba un lah lehse ban kren ne ban ai jingmut, kaei ka dor jong ki nongrep, kaei ka dor jong ki nongthied bad kaei ka jingpynlut pynsep ba ki nongrep kim dei ban shah khñiot dor” u la ong.
Nalor kata u la ïathuh ruh ba ki la ai jingmut ruh haba ïadei bad ka Agriculture Policy ban shim rai da ka Sorkar bad “Ngi ngeit skhem ba u DC un phah ïa ka khubor sha ka Sorkar ban pynkynmaw ba na ka liang ki nongrep ki donkam ïa ka Agriculture Policy.”
Haba bynrap u la ïathuh ruh ba ki nongrep hapoh ka East Khasi Hills District ki duna bha kiba ïoh ïa ka skhim PMKISAN kaba dei ka jingmyntoi bad ka ban ïarap ïa ki nongrep ba kin pynbha ïa ka kam rep jong ki, u la pyntip ba u DC u la kyntu ïa ki nongrep ba kin shim ïa kane ka lad ba la pynmang da ka Sorkar Pdeng.
U Bah Commander u la kyntu ruh ïa ki nongïalam jong ki unit nongrep ba kin lum jingkheiñ ïa ka jingdon ki nongrep khamtam ïa ki nongrep kubi khnang ban lah ban ai jingkheiñ sha u DC bad ba ka Sorkar kan pyrkhat ban pynïoh ïa kano-kano ka jingïarap ïa ki nongrep.
