Shillong, Naitung 24
Watla ka jur ka jingshah thok ha ka kyrteng ban aikam ïa ki samla na Meghalaya ban leit trei shabar ka Jylla hynrei dang bun pat kiba dang mih na Jylla ban leit trei shabar Jylla kane ka la jia biang sa ïa ki hynñiew ngut ki samla Khasi kiba dei na Shillong kiba sah ha ki bynta jong ka Mawlai.
Kine ki samla na Mawlai ki la ïoh ka jingtyrwa ban siew arphew ar hajar tyngka lada ki leit bylla sha Tamil Nadu ban trei ha ki company hynrei kaba sngewsih ka long ba ynda ki la poi sha katei ka jaka ki la shah khñiot ïa ka dor namar ki ïoh jingsiew kumba shiphew haduh khadar hajar shi bnai.
Haba ïakren bad u President ka KSU Bangalore Unit u samla Donboklang Nongphut u la ïathuh ha kine ki taiew ba la dep ki don ki samla kiba la ngat ha ka apot ban shah thok ïa ka jingsiew kumta ki la pyntip noh sha ka KSU Bangalore unit ban pan jingïarap.
U la ïathuh ba kine ki samla kiba dang shu poi sha Tamil Nadu ki mut ban leit phai noh hynrei kim ïoh lad ban mih namar ki dang shu poi haba ki trai company ki la pynbiang ïa ka jaka sah bad ïa ka bam.
Shuh shuh u la ïathuh ba kine ki samla ki dei kiba shah tyrwa kam ha ki briew kiba na Assam kiba la kular ban siew haduh arphew ar hajar tyngka shi bnai hynrei ynda ki la poi sha Tamil Nadu ki la ïoh tang shiphew hajar da kaba ai daw ba ki la ot ïa ki jnit ki jnat namar ki ïaid lyngba ki agency. U la ong ba ym dei tang kine ki samla kiba mad ïa kane ka jingjia hynrei ka la jia bunsien namar ki la shah kular ban aikam ynda ki la poi sha jaka ki shah dawa pisa pynban.
“Kaba lyngngoh ka long ba don ki Khasi kiba kular ban ai kam ïa ki samla shabar ka Jylla ynda ki la poi sha jaka, ki donkti lang ban thok pisa namar ki ïoh pisa lang,” u la ong. U la ong ba kine ki samla kiba la don mynta ha Tamil Nadu kim pat ïoh mih na katei ka jaka bylla namar ki hap ban trei shi bnai eiei khnang ba kin ïoh pyllait ïa ka jinglut kaba ka company ka la pynlut.
Kumta u Bah Donboklang u la kyntu ïa ki samla napoh ka Jylla haba ki thmu ban leit trei shabar ka Jylla ki dei ban da kylli pyrthew khnang ban nym shah thok.
