Shillong, Naitung 24
Ka North East Students’ Organisation (NESO) ka la pynrem jur ïa ka jingleh donbor jong ki pulit ha ka jingïakhih jong ki samla pule kaba la long ha New Delhi ha ka 20 tarik Naitung, da kaba ong ba ka dei ka jingpynkheiñ ïa ki hok ka synshar paidbah.
Ka seng ka la kyntu ruh ïa ka Sorkar Pdeng ban ïatreilang bad ki samla pule kiba ïakhih ha ka jaka ban pyndonkam da ka bor.
Ha ka kyrwoh, u Chairman ka NESO, u Bah Samuel B. Jyrwa, u la ong ba ka jingpyndonkam da ki lathi, ki tyndong lyer pynsat khmat bad ka jingkynnoh ba don ki briew kiba phong da ki jaiñ ïing ha ryngkat ki lathi pyrshah ïa ki nongïakhih ba khlem tiar, ka long ka bym ïahap bad ka jingthombor ïa ka hok jong ka Riti-Synshar ban ïakhih da kaba jai-jai.
Ka NESO ka la kdew ba ka jingïakhih ka tawiar halor ki jingeh kiba la slem bah ba ki samla pule ki ïakynduh ha kylleng ka ri – ka jinglait tuh ba na ka por sha ka por jong ki jingkylli thoh eksamin bad ka jingbym don ka jingshai bad ka jingkitkhlieh ha ki rukom thung kam bad ki rukom pynlong ïa ki ‘test’.
“Kine kim dei ki mat kiba rit. Ki ktah ïa ka lawei jong ki ‘million’ ngut ki samla kiba don ka jingangnud,” la ong ka kyrwoh.
“Ha ka jaka ban shimkhia ïa ki jingeh lyngba ka jingïakren, ka Sorkar ka la jied ïa ka lynti jong ka jingpyntieng bad jingpynshitom beiñ,” ong ka seng.
Ka NESO ka la kynthoh ba ym dei ban ailad ba ki jingbym lah ha ka rukom treikam bad ki jingthurmur ha ka jingpynïaid kam ban pyntroiñ ïa ka jingpyrshang jong ki samla pule kiba pynkhreh da ka jingmut kaba bha na ka bynta ki eksamin jong ka ri.
Ka seng ka la pynpaw ruh ïa ka jingïatylli bad baroh kiba la ïashim bynta lang ha ka jingïaid paidbah kaba jai-jai bad kner ïa ka jingkyrshan sha kito kiba la mynsaw ha ka jingshah thombor, da kaba kitbok-kitrwiang ba kin koit noh kloi.
Ka NESO ka la kyntu ïa ka Sorkar India ban plie lad ïa ka jingïakren kaba shong nongrim, ban pynbeit ïa ka jingkitkhlieh na ka bynta ka jingpyndonkam ïa ka bor kaba shaba palat, bad ban wanrah ïa ki jingpynkylla kiba pura ban tei pat ïa ka jingshaniah ha ka saiñdur thoh eksamin bad thung kam kumjuh.
Shuh shuh ka jingwanrah biang ïa ka jingshaniah, ka jingbym shah liang bad ka jinglong hok ha kine ki rukom treikam ka long kaba donkam kyrkieh, la ong ka seng, da kaba bynrap ba ïa ki jingangnud jong ki samla pule ym lah ban ïapeiñ da ki jingduna kiba na ka por sha ka por.
