Nongstoiñ, Nailur:
Ka Khasi Student Union (KSU) Nongstoiñ Circle ka dawa na ka Sorkar bad kumjuh na u Director jong ka tnat Pule Puthi ban thung noh pura ïa u nonghikai Jingkheiñ (Mathematics) na ka bynta ki khynnah pule ha ka Klass IX bad X hapoh ka skul Sibsing Memorial Government Higher School khnang ba kan ym long ka jingduhnong ïa ki khynnah skul kiba pule ha katei ka skul.
Halor kane ka bynta, ha kine ki kyndait sngi ka KSU Nongstoiñ Circle hapoh ka jingïalam u samla Robertgil Kharsewsaw, Education Secretary ka la leit ban ïakynduh ïa ki bor pynïaid ka skul Sibsing Memorial ban tuklar halor ka jingbym don ïa u nonghikai Jingkheiñ uba pura ha ka skul na ka bynta ki khynnah pule ha ka klas IX bad X.
Ka KSU ka la pynpaw ruh da kaba ong bat katkum ka jingïoh jingtip ka seng, ïa ka kam DSEO, SDSEO bad Joint Director la phah peit shipor ha ka Principal jong katei ka skul kaba la pyndkoh pat ïa ka jingtreikam jong ka bad ban thung briew pura ha kitei kam, bad la ong ba ka sorkar ka la ai daw ba ym don briew ban shimti bad ïa kane ka seng kam lah satia ban pdiang.
