Mawkyrwat, Nailur 24
Ki pulit jong ka Mawkyrwat ha ka Step Sngi U Blei ki la hiar sha kawei ka jaka kaba la tip kum ka Riat Thawlong kaba don hajan ka ïew Mawkyrwat, South West Khasi Hills hadien ba ki la ïoh jingtip ba ka don kawei ka metïap kaba la pyut ha kawei ka jaka riat kaba don kumba 20 phut eiei na surok.
Hadien ka jingtohkit, ha ryngkat ka jingdon lang ki bahaïing hasem, ki pulit ki la pyntip ba kane ka met ka dei jong u Bah Hopewelson Turnia, 38 snem ka rta, uba dei trai shnong na ka shnong Ngunraw bad sah pat ha Mawlangwir ryngkat ka kurim bad ki khun.
Katkum ki tyllong ba la ïohlum la ïathuh ba ïa u Bah Hopewelson la ïohi khatduh ha ka 20 tarik Nailur.
Ïa ka metïap jong une u rangbah la pynkit noh sha Civil Hospital Mawkyrwat ban leh ïa ka ‘post mortem’ bad halor kane ka jingjia na ka liang ki pulit Mawkyrwat ki dang pynlong ïa ka jingtohkit ban lap ïa ka daw halor ka jingkhlad une u rangbah.
