Shillong, Nailur:
U MLA ka UDP na Mawphlang, Bah Matthew Beyondstar Kurbah u la pynpaw ba u lah ban ïakhun hi ïa ka ilekshon MDC na Mawphlang-Diengiei lada ym don ba pan tiket.
Haba ïakren bad u Bah Kurbah u la ïathuh ba haduh mynta ym pat don kiba mih shakhmat ba pan tiket ban ïakhun ïa ka ilekshon MDC ka ban long la shem snem.
U la ïathuh ba ha u bnai ban wan un sa lum noh ïa ka jingïalang jong ki nongkyrshan ka UDP ha Mawphlang konstitwensi ban ïakren shaphang ka ilekshon MDC ka ban long ha u snem 2024.
Haba kylli, lada ym don ba pan tiket phin leh kumno? U Bah Kurbah u la pyntip ba lada ym don ba pan tiket u hap ban ïakhun hi.
Shuh shuh u la pynpaw ba lada ka UDP Mawphlang Circle ka la pynbna ban wad kyrtong kin sa don beit kiba mih shakhmat ban pan tiket.
Haduh mynta ki kyrtong kiba la thikna ban aireng ha ka ilekshon MDC ha Mawphlang constituency ki long u Bah Lamphrang Blah uba dei u MDC ba mynta ban ïakhun na ka NPP, nangta na ka seng UDP, ka Congress, ka VPP bad kiwei-kiwei ki ban sa mih ynda la jan dei ka por.
Kum ban shu pynkynmaw, ka UDP ha kine ki sngi ka la bthah ïa ki jylli treikam ban lum noh ïa ka jingïalang ban wad kyrtong ban pynïeng na ka bynta ka ilekshon MDC ban long ha u snem 2024 khnang ba kin phah sha ki district bad khatduh ban shim rai dei ka State Election Committee.
