Shillong, Nailur 25
Ka Ïingdorbar Khasi Hills Autonomous District Council (KHADC) ka la ai ka jingmynjur ban wanrah ka jingpynkylla hapoh ka Elaka Adminis -tration (Amendment) Bill, 2023 na ka bynta ban ithuh ïa ki seng samla shnong, seng longkmie, dorbar shnong, dorbar dong, bad social vigilance committee.
Ïa kane ka aiñ la wanrah da u Deputy CEM Bah Pynshngaiñlang N Syiem uba dei peit ïa ka tnat Elaka jong ka KHADC.
Na ka liang u nong-ïalam ka Liang Pyrshah, u Bah Titosstarwell Chyne u la ong ba ki MDC ka Liang Pyrshah kim pyrshah ïa kane ka aiñ, hynrei ym sngew ïahap ïa ka rukom wanrah ïa kane ka Bill namar ka por ka long kaba lyngkot khlem ïoh lut ban peit ïa ki jnit ki jnat hapoh jong kane ka aiñ.
Ka Liang Pyrshah ka la phet noh na Ïingdorbar hadien ba ka Liang Synshar kam treh ban phah shwa sha ka Select Committee ba kan khmih bniah bad ha u Risaw dei ban wan biang sha Ïingdorbar.
U Dy CEM u la pynshai shibun ki jingmyntoi lyngba kane ka aiñ kaba lah ban ithuh ïa ki seng longkmie, seng samla ha shnong bad kiwei kiwei.
U la ong ba lada donkam ban pynbeit biang ïa kane ka aiñ, yn sa wanrah biang ha Ïingdorbar hynrei kaba donkam kyrkieh ka long ban mynjur ïa kine ki kyndon hapoh ka aiñ.
U nongïalam ka Liang Pyrshah u la kynnoh ba ka dei ka jinglehbor naduh ka jingkhot pynlong ïa ka dorbar kyrpang bad ka jingmynjur ïa kane ka aiñ.
Hynrei u Bah Pynshngaiñlang N Syiem u la ong ba kam dei ka jinglehbor hynrei ka jingdonkam kyrkieh ban mynjur ïa ka Bill ban long ka jingshngaiñ ïa ka jaitbynriew.
U la ong ba shen yn sa phah sha u Lat lyngba ka tnat DCA ban mynjur ïa kane.
Ha kawei pat ka liang, ka Ïingdorbar ka la phah ïa ka Bill halor ka Hima Nongkhlaw sha ka Select Committee.
