Nongstoiñ, Nailur 26
Ka Hill State People Democratic Party (HSPDP) ha ka 26 tarik mynta u bnai ka la ïoh ban kynmaw burom ïa ka lyngkhuh sngi ïap kaba phra jong u Maieid Hopingstone Lyngdoh uba long u nongseng bad nongïalam jong ka seng.
Ïa kane ka jingrakhe kynmaw burom ïa ka lyngkhuh sngi ïap kaba phra jong utei u nongïalam la pynlong ha Langpih, ha kaba ki nongïalam ba hakhmat ka HSPDP ba kynthup ïa u Bah KP Pangniang, President, Bah Panborlang L Ryntathiang, General Secretary ka HSPDP Sengkmie, u MLA Bah Methodius Dkhar, MDC Bah Martle N Mukhim uba long ha kajuh ka por u Senior Vice President ka HSPDP bad kiwei kiwei ki la ïoh ban buh syntiew ruh ha u mot sahnam jong u Maieid Hoping ba la tei ha Ïew Langpih da ka Raid Mynsaw.
U Bah KP Pangniang haba kren ha katei ka sngi u la pynkynmaw biang ïa ki ba bun ki mat sha ki paidbah bad ïa ki kam bad ki matti jong u Maieid Hopingstone uba la leh na ka bynta ka Ri bad ka Jaidbynriew bad ïa ka Jylla hi baroh kawei kumjuh ruh ha kaba ïadei bad u pud u sam bad kiwei kiwei.
U la pynpaw ruh da kaba ong, “Baroh khatar tylli ki jaka ïakajia, ngan ngeit ba kin nym don ha ka thup jong ka jingïakren lada une u rangbah um don, kumta ka don ka hok ba u mot jong une u rangbah un ïeng ha Langpih”.
Ka Kong Badariti Lyngdoh Nonglait kaba dei ka pyrsa trai jong u Maieid Hopingstone Lyngdoh, haba ai jingkren, ka la ong, “Na kawei ka snem sha kawei pat ngi kynmaw burom ïa ka lyngkhuh sngi ïap u Maieid Hoping la ka long ha Langpih, Mawkyllei bad kiba bun ki jaka, hynrei ka jingkylli ka long hato ngin shu kynmaw ïa kata ka sngi lyngkhuh sngi ïap ka jong u, ne ngin kynmaw ïa ki nuksa kiba bha kaba u, u la ieh shadien ïa ngi ki longdien ba ngin bud bad pyrthuh bud.”
U Bah Methodius Dkhar u la ong ba u Maieid Hopingstone u dei ‘riew rangbah, u don ka jingsah nud wat ha ka sngi shuwa ba un khlad noh ruh, bad kawei na ki jingsahnud ka long kumno ban pynbeit ïa u pud u sam, kawei pat kumno ban ïoh ïa kata ka Jylla kaba pura ka ‘Khasi Jaiñtia State’.
U la ong ruh ba u Maieid Hopingstone ha ki por kiba u dang im u la ju ïatrei lang bad ki sorkar bapher bapher hynrei haba ïatrei lang kam shym mut ba u klet noh ïa ka Langpih, kam shym mut ba u leit die noh ïa ki khappud hynrei u leit da kaba u rah ïa ki nongrim bad ki jingdawa bad halor ki nongrim u leit ban ïatreilang bad ka sorkar.
U Bah Methodius u la ong ruh ba ha ki por ba la kut ka ilekshon, ki la leit ban ïatreilang bad ka sorkar hapoh ka Jylla, ha kaba ka la don lehse ka jingshah kren beiñ ïa ar ngut ki MLA ka HSPDP bad ym tang ka jingshah kren beiñ hynrei ka la don ruh ka jingshah kren beiñ ïa ki nongkyrshan ka seng bad ka la don ruh lehse ka jingsngew noh mynsiew jong ki kpa tymmen kiba dei ki nongïalam kiba hakhmat kiba ïakhun Hill State bad ka jingshah kynnoh ba ka seng HSPDP ka la shet kylla ïa ka ri bad ka jaidbynriew bad ka HSPDP ka la shet kylla ïa ki nongrim, hynrei u la pynpaw da kaba ong, “Nga kwah ban ïathuh bad pynshai ba na ka liang ka seng ka leit ban kyrshan ïa kano kano ka sorkar kam dei ba ka klet noh ïa ki nongrim ka seng.”
Katba na ka liang u Bah Martle N Mukhim u la pynpaw ka jingsngewkmen ban ïoh ïa don bynta ha katei ka jingkynmaw burom ïa ka lyngkhuh sngi ïap jong utei u rangbah, hynrei u la ong ba tang kawei to sngewkhia ïa ka jong ngi, iehnoh shuwa ïa ka jong nga, ha kaba u la ong ba kaba mut to shim ïa ka jingkitkhlieh, wan shakhmat ban ïa kit ryngkat-ryngkat ïa ka saiñdur ka saiñdar ïa ka imlang ka sahlang.
U la ïathuh ruh ïa bun ki bynta ha kaba ïadei bad ka jingïaid lynti jong u Maieid Hopingstone Lyngdoh ha ka por ba u dang im ha kaba ma u bad u Maieid Hoping ki ïatreilang na ka bynta ka khia ka shon jong ka jaidbynriew.
U Bah Martle u la pynpaw ruh ïa ka jingsngewkhia kaba jur halor ka jinglong jingman ha ka Jylla hi baroh kawei ha kine ki sngi kiba mynta ha kaba u la ong, “Kane ka ri bad ka jaidbynriew ka jong ngi lada nga kren mynta to ngin ïa im sngi nga mut ban ong map Blei ba kan nym lut katba nga dang im; kata ngam mut eh ïa u pud u sam, nga mut ïa ka burom ka akor ïa ka pyrkhat ka pyrdaiñ, ïa ka trei ka ktah, nga mut ba kam dei ba kan synshar ka bishni, kam dei ban synshar ka lalot, ngim dei ban hap ha ka jingpynshoi jong ka jingkwah spah ka jingkwah phew hynrei ngi dei ban bat skhem ïalade hapoh ka nongpynïaid jong ka nongrim ka jingshisha bad ka hok na ka bynta ka jingbit ka jingbiang jong ngi kiba mynta bad na ka bynta ka lashai.”
Shuh shuh nalor kitei ki nongïalam ba hakhmat ka HSPDP, la donlang ruh u Bah Hindro Samakha, Chairman ka Raid Mynsaw, ki ‘riew rangbah, ki longkmie, ki khynnah skul ka Raid Mynsaw bad kiwei kiwei.
