Shillong, Nailur 26
Ka Ïingbishar kaba halor ka Jylla (Meghalaya High Court) ka la bthah ïa ka Sorkar Jylla ban ai jingtip halor ki jingbiang ki jingdonkam (facilities) ha ki jaka thang briew ym tang ha Shillong, hynrei ha kiwei ki jaka kum ha Tura, Jowai, Nongstoiñ bad Nongpoh, bad ka la bthah ïa ka Sorkar Jylla ban shim ki lad ban kham pynbiang shuh shuh ïa ki jingdonkam kynthup ka jingtei ïa ka jaka thang briew da ka ilektrik.
Ka Ïingbishar ka la banjur ruh ba donkam ban pyntikna ba ki jingpynsngew kiba ïadei bad ka mariang dei ban da sumar bad shimkhia bha.
Ka Ïingbishar ka la pynmih ïa kane ka jingbthah hadien ba ka la sdang ban bishar ïa ka jingmudui kaba ka Ïingbishar hi ka la pynwan kum ka Public Interest Litigation (PIL) hadien ba ka la don ka shithi ujor kaba la phah da u President ka Seng Khasi Hima Mawsynram u Bah Tyllilang Myrthong sha u Chief Justice ha ka 8 tarik Nailur, 2023.
Ïa kane ka PIL la shim ban bishar da ki ar ngut ki nongbishar u Chief Justice, Sanjib Banerjee, bad u Justice, B. Bhattacharjee.
“Ka long kaba donkam ban pyntikna ba kin biang ki jingdonkam (adequate facilities) ym tang ha Shillong hynrei ha kiwei ki bynta ka Jylla ban don ka jaka thang briew kaba paka na ka bynta ban pyndep ïa kaba sah,” la ong ka Ïingbishar lyngba ka jingbthah kaba la pynmih ha ka 22 tarik mynta u Nailur.
Ka Ïingbishar ka la ong ruh ba kum kine ki jingdonkam ki dei ban don bad pynïoh ïa baroh ki jaitbynriew kiba donkam ha kane ka Jylla kynthup ïa ki riewlum khnang ba ka jingpyndep ïa ka rukom ban lehburom khatduh ïa kiba la khlad kan long katkum ki riti dustur kiba dei ban bud katkum ka rukom kaba dei ban burom bad kaba long jar jar.
Ïa kane ka PIL la buh biang ban shim bishar ha ka 3 tarik, Risaw 2023.
Kum ban pynkynmaw, u President ka Seng Khasi Hima Mawsynram, u Bah Tyllilang Myrthong u la thoh shithi sha u Chief Justice ha ka 8 tarik Nailur ban kyrpad ban shim bishar hi da ka Ïingbishar namar ka jingpynjah ïa ki kot ki sla kiba la don bad ka Sorkar Jylla lyngba ka tnat Planning, Investment Promotion & Sustainable Development haba ïadei bad ka jingmang pisa ban tei ïa ka jaka thang briew jong ka Seng Khasi Hima Mawsynram, Mawsynram Syiemship ha Kenmynsaw, ha shnong Synteiñ, East Khasi Hills District.
Ha kane ka shithi la batai ba ka seng ka la phah ïa ka jingpynkhreh ryngkat ka jingai jingkheiñ (Plan and Estimate) na ka bynta ban tei ïa ka jaka thang briew kaba kot sha ka ?35,01,687.00 (Laiphew San Lak Shi Hajar Hynriew Spah Phraphew Hynñiew).
Ha shithi, la pynkynmaw ruh ïa ka hukum jong ka Meghalaya High Court lyngba u Chief Justice barim u Biswanath Somadder bad u Justice H.S. Thangkhiew haba ïadei bad ka PIL vide PIL No.9/2019 jong u P. Khongsit pyrshah ïa ka Jylla bad kiwei ha kaba ka Ïingbishar ka la bthah ïa ka tnat Community and Rural Development ka Sorkar Jylla ban lum jingïalang ban ïakren ha ka 26 tarik Rymphang, 2021 haba ïadei bad ki jaka thang briew khamtam jong kito kiba dang don ha ka niam Khasi tynrai.
U nongujor u la batai shaphang ka jingphah ïa ki kot ki sla kiba donkam bad kumjuh ruh ki kot ki sla kiba la pynïaid da ki tnat treikam ka Sorkar haba ïadei bad ka jingkyrpad ka Seng Khasi Hima Mawsynram ban tei ïa ka jaka thang briew.
Hynrei la ong ba ka long kaba kyndit bad sah lyngngoh ba haba leit ban wad jingtip na ka tnat treikam ka Sorkar la ïoh jingtip pynban ba ki kot ki sla kiba la don bad ka Sorkar ki la shah leh thok namar ym shym la lap shuh ha ha ki jaka buh kot buh sla jong ka Sorkar (government’s file).
“Kito kiba leh thok ban pynjah ïa ki kot ki sla ka Sorkar ki dei kam runar namarba katkum ki jingbuh ryntih ïa ki kot kiba la don bad ngi, ki kot ki sla la dep phah na ophis Deputy Commissioner, East Khasi Hills District, Shillong (No.DPL.36/16/2016-2017/624/348 Dated Shillong the 7th June, 2023) sha OSD & Ex-Officio, Joint Secretary ka Sorkar Meghalaya, Planning Investment Promotion & Sustainable Development Department bad ïa kane la dep ïohpdiang da ka ophis ha ka 12 tarik Jylliew, 2023,” la ong u Bah Myrthong ha ka shithi.
