Shillong, Nailur 27
U Myntri ka Sorkar Jylla, Bah Paul Lyngdoh ha ka Sngi Balang u la ong ba ka jingïasoi ïa ka soskular ka jingïateh bakhatduh bad ka Sorkar Assam halor u pud u sam ka lah ban long shuwa ban kut jong u snem 2023.
“U Myntri Rangbah ka Jylla u la shimkhia ïa kane bad u Myntri Rangbah ka Assam bad nga ngeit ba ka jingïalang kan sa long shen,” la ong u Bah Lyngdoh haba jubab halor ka jingïapyni bor hapdeng ki Khasi-Pnar bad ki Karbi ha ki jaka khappud (Lapangap).
U la ong ruh ba kitei ki jingïapynibor ki la don la bun-bun snem mynta bad ka lynti ban pynkut ïa kane, kan wan ynda la lah ban pynbeit ïa ka jingkajia pud bad ka Assam.
“Kumba phi tip, na ki 12 tylli ki jaka kajia, mynta, ngi la pynduna ïa ki jaka ba ïakynduh jingeh bad ngi khmih lynti ba hashuwa ban kut u snem 2023, ka soskular jingïateh kaba khatduh bad ka Sorkar Assam yn sa lah ban soi bad kane kan wanrah lang ka jingpeitngor ïa kiba kum kine ki jingjia hadien habud,” u la ong.
Haba kylli, u la ong, “Nga tharai u Symbud Myntri Rangbah ka Jylla ba khmih ïa ka tnad kam pohïing lem bad uwei pat u Symbud Myntri Rangbah shen kin sa sleit mih sha kitei ki jaka.”
Ha kawei ka liang, u la ïathuh ba ka Sorkar ka dang ai jinghikai ïa palat 2500 ngut ki pulit bad hadien kane, kin sa pynïasoh sha ka kam.
Haba pynsngew ba yn sa pyndap shuh sa 1500 tylli ki kam ha u snem ban wan, u Bah Lyngdoh u la ong, “Kumba 4000 tam ki pulit kin sa pynïasoh sha ka tnad. Kumba ka long mynta, ngi duna nongtrei shaba palat bad kane ka buh jingeh.”
Haba phai sha ka Langpih Sector, u Myntri u la pynkynmaw ba ha ka jingïalang kaba la dep lem bad u Myntri uba na Assam, la lah ban pynduna ïa ki jaka jong ka jingkajia.
“Kumta nga kyrmen skhem ba shisien ba ngi la pynlong ïa ka jingleit jngoh (hadien ka por slap), ngi la dep ïa mynjur ban ïakynduh la kumno-kumno ha u Risaw namar ka jingthmu jong ngi ka long ban aiti ïa ka kaiphod ba khatduh ha u Naiwieng,” la ong u Bah Lyngdoh.
Shuh shuh haba ban jur ban pyndep ïa ka jingleit jngoh bad ban aiti ïa ka kaiphod, u la ong ba ka Langpih ka don hapdeng ka jingjai-jai bad ka suk ka saiñ bad kam long shuh kumba long ha ki por ba la leit.
