Shillong, Nailur 27
Ka Meghalaya High Court ha ka Sngi Balang ka la ai da ka jingpynsaja kaba tyngeh da kaba ai hukum ban set patok shirta jingim pyrshah ïa ki arngut kiba la donkti ban pynïap ïa uwei u samla pule ka St. Anthony’s College, Shillong, ha u snem 2006.
U Bernard Lyngdoh Phawa bad u Bonie Lyngdoh Phawa ki la ngat ha ka jingshah pynsaja ban shong patok baroh shirta jingim halor ka jingpynïap ïa u Biplab Das uba dei u samla pule ha ka Mass Communi-cation ha St. Anthony’s College ha u snem 2006.
Lah ban kdew ba ka ïingbishar kaba la tian bishar lane ka ‘Trial Court’ halor katei ka jingjia ka la pyllait noh ïa kitei ki arngut, hynrei ka sorkar ka la leit ujor sha High Court. U nongshah mudui u banyngkong ha kane ka mukotduma jong ka sorkar u dei u Bernard bad bud sa u Bonie.
“La shem ba baroh arngut ki la donkti ban pynïap bad ban buhrieh ïa ki jingshisha halor kane ka kam. Baroh arngut kin hap ban shong patok baroh shi jingim katkum ka kyndon 302 IPC bad lai snem Rigorous Imprisonment hapoh ka kyndon 201 IPC. Kine baroh artylli ki jingpynrem bad jingshah set patok kin ïaid lang ha kajuh ka por kaba mut ba ha ki lai snem, kin hap ban shah set patok katkum ka kyndon 201 IPC (Rigorous Imprisonment), bad hadien kata, kin bteng ban shong patok shirta jingim,” la ong ka High Court ha ka hukum.
Ka High Court ka la ong ruh ba katei ka jingpynïap ka long kaba la leh dusmon da ka jingthmu ban ïoh pisa na une u lanot – la ka dei da kaba shu lute lane da kaba shu rahbor da ka jingthmu ban ïoh pisa – bad u lanot u la mad ïa ka jingïap ba sangsot namar ka jingthmu ba sniew jong kitei ki arngut. “Ka long kaba shonghok ba kine ki arngut kin ïoh ïa ka jingpynsaja kaba ïahap bad ka kam kaba ki la leh,” la ong ka High Court.
Ha ka miet jong ka 18 tarik Rymphang, 2006, u Biplab Das, 21 snem ka rta, u khlem wanphai satia sha ka jaka sah, bad namarkata, ha ka step kaba bud, la ai jingujor sha ki pulit ka thanat Sadar da ki briew kiba dei ki nongpeit ïa une u samla.
Ka la don ka jingwad ïa utei u samla, bad ha ka janmiet jong ka 19 tarik Rymphang, 2006, la lap ïa kawei ka PCO ha Mawroh kaba u Biplab u la pyndonkam ban ‘phone’ ïa kawei na ki paralok jong u ïa kaba la tip kyrteng kum ka Nirvika Singhania ha ka por kumba 8:30 mynmiet ha ka 18 tarik Rymphang, 2006.
Ha ka jingshisha, u Bernard u la don bynta lang ban leit wad ïa u Biplab bad u la leit ruh kata ka PCO ha Mawroh. Hynrei katba u Bernard u dang ap ha ka kali, uwei na ki paralok u Biplab u la ïoh jingtip na u trai jong ka PCO ba u Bernard u la long uwei na kiba la wan sha ka PCO ha ka por mynmiet ha ka 18 tarik Rymphang, 2006.
U Bernard u la shah kem ha ka por 9 baje mynstep jong ka 20 tarik Rymphang, 2006 da ki pulit ka thanat Sadar. Hadien ba la tohkit, u Bernard u la pynmih sa ïa ka kyrteng jong u Bonie bad ki pulit ki la kem ïa u ha ka 23 tarik Rymphang, 2006.
Katkum ka jingïathuh jong u pulit uba tohkit, u Bernard u la pyntip ba ha ka 20 tarik Rymphang, 2006, la pyndonkam da u tyllai ban pynïap ïa u Biplab. Une u pulit u la ïathuh ruh ha ïingbishar ha ka por jong ka jingtian bishar ba ïa ka met jong u Biplab la lap ha ka 21 tarik Rymphang, 2006, da kaba ai ksai ba dei u Bernard uba la ïalam ïa ki pulit sha ka jaka ba la don ka metïap. Ïa uta u tyllai la ïoh kurup ha ka 24 tarik Rymphang, 2006.
Katkum ka kaiphod jong ka ‘post-mortem’, la shem ba utei u samla u la khlad na ka jingshah ksih na ryndang. U doktor uba la leh ïa ka ‘post-mortem’ u la pyntip ba ka jingkhlad jong utei u samla ka long kumba 48 kynta shwa ban sdang leh ïa ka ‘post-mortem’. Kane ka mut ba u Biplab u la khlad ha ka 20 tarik Rymphang, 2006.
Lah ban kdew ba ka ïingbishar ba la tian bishar lane ka ‘trial court’, ka la kyntait ba u Bernard bad u Bonie Lyngdoh Phawa ki dei kiba la donkti ban pynïap ïa utei u samla watla ka la paw ba ka la don ka jingphla na kine ki arngut ha ka por ba ki la ïathuh ïa kaei kaba la jia katkum ka kyndon 164 jong ka Code of Criminal Procedure, 1973.
Hynrei ka ïingbishar ba la tian bishar ka khlem peit ïa kine ki jingphla halor ka nongrim ba ki don ki jingbym biang ha ka por ba la shim ïa ka jingphla jong kitei ki arngut. Kane kajuh ka ïingbishar ka khlem ngeit ïa ki muktiar jong ka sorkar halor ka nongrim ba ki la don ki nongsakhi kiba la kum ong ba ka tarik ka dei 19 tarik Rymphang, 2006 ha ka jaka jong 18 tarik Rymphang, 2006. Sa kawei pat ka long ba kane ka ïingbishar ka khlem peit ïa ki ‘call record’ ba la shim na ka PCO ha Mawroh.
Dei ha ka 26 tarik Lber, 2019, ba katei ka ïingbishar lane ka ‘Trial Court’ ka la ai hukum ban pyllait ïa kitei ki arngut na ki jingshah kynnoh ba ki la donkti ha ka jingpynïap ïa utei u samla.
Na ka liang ki muktiar jong kitei ki arngut ki la maham ïa ka High Court ba kam dei ban tuklar ïa ka hukum jong ka ‘Trial Court’ kaba la pyllait ïa ki. La ong ruh ba yn ym lah ban rai pynrem tang namar ka jingphla jong uba shah kem lane ban shim na ka jingphla jong uwei na kiba shah kem. Kane ka dei halor ka jingkynnoh jong u Bernard ba u Bonie u la ksih ïa u Biplab da u tyllai.
Haba ka la peit bad bishar, ka High Court ka la kdew ba na ki kot ki sla bad ki sabut ba la ai da ki muktiar ka sorkar sha ka ‘Trial Court’, ka la paw shai ba na ki jingïathuh jong u Bernard bad u Bonie, kine ki arngut ki la shong dih kyiad ha kawei ka jaka ha Polo ha ka janmiet jong ka 18 tarik Rymphang, 2006; na ka jingïathuh jong uwei u nongñiah Auto, u Bernard, Bonie bad uwei u samla uba dei u bar jylla ki la shong lang ha kata ka Auto na Polo sha Mawroh; ka la don ruh ka sabut ba la ‘phone’ ïa ka Nirvika na ka PCO ha Mawroh ha u ‘phone number’ jong ka ha ka por 8:18 mynmiet ha ka 18 tarik Rymphang, 2006; na ka jingïathuh jong u trai ka PCO ha Mawroh ha u paralok jong u Biplab ba u Bernard u la don lang ha PCO ha ka janmiet jong ka 18 tarik Rymphang, 2006; bad kaba khatduh ka long na ka jingïathuh jong u Bernard bad u Bonie, ki la don lang bad u Biplab hashwa bad ha ka por ba khlad u Biplab ha u lum jingtep ha Mawroh.
Ha kajuh ka por, u Bernard bad u Bonie ki la ïathuh aïu ki la leh ïa ka metïap jong utei samla bad ïa ka met la lap na lum jingtep hashwa ban leit khlong noh ïa ka bad hashwa ban leh ïa ka ‘post-mortem’.
Na ka liang ka High Court ka la pynkylla noh ïa ka hukum jong ka ‘Trial Court’ ba la pynmih ha ka 26 tarik Lber, 2019. La shem ba u Bernard bad u Bonie ki la donkti ha ka jingpynïap ïa u Biplab bad ka la rai pynrem ïa ki hapoh ka kyndon 302 IPC ryngkat ka kyndon 201 IPC namar ka jingpynïap ïa u Biplab bad ka jingbuhrieh ïa ki sabut. Ka High Court ka la ong ba ka la don ka jingthmu bad jingïasylla lang hapdeng u Bernard bad u Bonie ban leh ïa kane ka kam bymman.
Ka High Court ka la bthah ba ïa u Bernard bad u Bonie dei ban rah noh mardor sha patok bad ba kin shah set katkum ka hukum ba la pynmih.
