Shillong, Nailur 27
U Bah Pynïaid Sing Syiem uba long u CEM ka KHADC u la kynnoh ba dei ka jingrwai ba la thaw da u Bah Smiling Mylliemngap kaba la pynrem ïa u Bah Ardent Basaïawmoit ha ka ilekshon MLA ha u snem 2018 bad u dei u juh u nongrwai uba la rwai ïa ka jingrwai prah ka seng VPP uba la pynjop ilekshon ïa u Bah Ardent bad kiwei ki kyrtong mynta u snem.
U Bah Pynïaid u la ong ba u Bah Smiling Mylliemngap u la rwai ïa ka jingrwai ilekshon u Bah HS Shylla kaba ong “U nongmihkhmat u nongmihkhmut, mih tang ka khmat ka shkor kyllut” ha u snem 2018 haduh ba u Bah Ardent u la rem ha ka ilekshon ha katei ka snem.
Kumta u la don jingkyrmen ba u Bah Smiling Mylliemngap un sa rung NPP noh lada u treh.
Nalor kane, u Bah Pynïaid u la pyntip ba ha kine ki sngi u la leit pynkupburom namar ka KHADC ka ai mynsiem ïa baroh kiba donsap wat la dei u nongrwai ïa ka seng VPP.
U Bah Pynïaid u la kynnoh ba u prah ka Voice of the People Party u dei u prah na West Bengal. Dei na kata ka daw um don jingtieng shuh ban ïakhun ha kawei pat ka ilekshon hynrei u tieng lada dei u prah Khasi.
U la ong ba ha ka por ilekshon MLA ki nongkyrshan TMC ki la leit kyrshan ïa u kyrtong prah ha Mawryngkneng constituency.
Kumta u la ong ba lada dei u prah na West Bengal ka NPP kan nym don jingeh ban ïakhun ha kane ka ilekshon ban wan khamtam ka ilekshon MDC ban long u snem 2024.
U la ong ba ha ka shisnem ba u la long MLA u la ïoh ban wanrah palat shispah klur tang ka skhim sam um dih ha ki shnong, nangta la wanrah ïa ki surok, ki lynti syngkien, ka rep ka riang bad ka koit ka khiah hadah ba ïa ka Mawryngkneng PHC la kyntiew sha ka CHC.
U la ong biang ba ka VPP ka dei ka dur-bula jong ka TMC ha Ri Khasi namar la sakhi ha man ki constituency ki jaka ba tlot ka VPP ki phah kyrshan ïa ka TMC bad ha jaka ba tlot ka TMC ki phah leit kyrshan ïa ka VPP.
