Shillong, Nailur 28
Ka Lympung ki Seng Kynthei Shillong bad Khapsor ki la leit ai khublei ïa u Bah Pynshngaiñ N Syiem uba dei u Deputy Chief Executive Member (Dy CEM) ka KHADC namar u la wanrah ïa ka aiñ ha ïingdorbar ba dang shu dep ba ki kynthei kin long ki dkhot Executive Committee jong ka Dorbar Shnong.
Haba ïakren bad ka Kong Theilin Phanbuh kaba dei ka President ka Lympung ki Seng Kynthei Shillong bad Khapsor ka la pynpaw jingsngewkmen haba ki kynthei ki don bynta ban kit ïa ka lyngkor jong ka shnong ban wanrah ïa ka suk ka saiñ.
Ka la ïathuh ba ïa kane ka lympung la seng naduh u snem 1992, pynban ka jingdawa ban pynrung dkhot ha ka Executive Committee Dorbar Shnong ka la sdang naduh u snem 2021, hynrei ka dang urlong mynta hapoh ka jingïalam u Bah Pynïaid Sing Syiem kum u CEM bad Bah Pynshngaiñ N Syiem kum u Deputy CEM.
“Haduh mynta ngim pat kwah ba ki kynthei kin long Rangbah Shnong hynrei ngi sngewkmen haba ka KHADC ka la pynrung dkhot ïa ki kynthei tang ha ka Executive Committee khnang ba ngin tip ïa kaei kaba ka shnong ka shim rai” ka la ong.
Haba kylli kan ktah ne em ïa ka kynthei ba kan kit ïa ka lyngkor jong ka shnong haba ka dei ban peit bad sumar ïa ki kam ïing, ka Kong Phanbuh ka la ong ba katkum ka juk ki kynthei ruh ki la ïatreilang ryngkat bad u shynrang ha ïing ha sem.
Katba u Bah Pynshngaiñ N Syiem u la ïathuh ba ha kane ka aiñ kaba dang shu wanrah yn kynthup ïa ar ngut ki kynthei ban long dkhot ha ka Executive Committee jong ki Dorbar Shnong.
