Nongstoiñ, Nailur 28
Ki ar tylli seng na West Khasi Hills ba kynthup ïa ka Federation of Khasi Jaiñtia & Garo People (FKJGP) bad ka Hynñiewtrep Youth Council (HYC) ki la pynpaw ïa ka jingsngewkhia kaba jur halor ka hukum jong u Deputy Commissioner ka West Khasi Hills ban pynkhuid shnong ha ka Sngi U Blei.
Ki nongkitkam ka FKJGP West Khasi Hills ki la ong ba ka FKJGP halor katei ka bynta ha ka Sngi Palei ka taïew ka la leit ban ïakynduh ïa u DC halor ka jingpynmih hukum kaba ïadei bad ka jingpynkhuid ïa ka wah Nonbah bad ïa ka ïew kaba la buh tarik ha ka 1.10.23 kaba dei ruh ka Sngi U Blei.
“Ka FKJGP ka pynpaw ka jingpyrshah jur halor katei ka hukum namar ba ka hap ha ka Sngi U Blei kaba dei ka sngi kyrpang jong ki riewngeit Khristan ha kylleng ka ri baroh kawei,” la ong ka seng.
Shuh shuh ka la ong ruh ba kane ka hukum ka lah ban dei na ka Sorkar Jylla ne Sorkar Pdeng, hynrei ka FKJGP ka pynpaw ba balei ka sorkar kam pynbeit ha kiwei ki sngi kum ka Sngi Saitjaiñ ne Sngi Nyngkong ban leh ïa kane ka prokram.
Ka FKJGP ka la pynpaw ruh da kaba ong ba kane kam dei ka sien kaba nyngkong kaba ka sorkar ka thombor ïa ki Khristan da kine ki jait rukom namar kham mynshwa ka sorkar ka mut ban pynbna ïa ka 25 tarik Nohprah kum ka ‘digital day’ bad mynta ka la sdang ban pynbeit shwa da ki prokram bad lada ym pyrshah bad shu ngeit kylluid katba ka ong, kan sa poi ka por ba kan sa ong ba ka Sngi U Blei ka dei ka sngi ba yn hap pynlong skul bad ophis.
Ha kajuh ka por ka FKJGP ka maham ïa ka sorkar ba lada kam lah ban weng ïa kane ka hukum kan sa poi ka por ba ka FKJGP ruh kan sa shong ban pyrkhat da kano ka lynti kan shim ha kaba ïadei bad kane.
Kumjuh ruh ki nongïalam ka HYC West Khasi Hills District hapoh ka jingïalam u samla Lumlang Kharsyiemlieh, President halor kane ka bynta ha kane ka juh ka sngi ka la leit ïakynduh ïa u Deputy Commissioner ka West Khasi Hills ban pynpaw ïa ka jingsngewdiaw ba ka bor Sorkar ka pynkhuid shnong hapoh ïew Nongstoiñ, wah Nonbah, bad kiwei de hapoh West lyngba ka Swachhata Hi Seva ‘Garbage Free India’ ha ka 1 tarik Risaw 2023 kaba dei ka Sngi U Blei.
“Ka HYC ka pynpaw ba ka West ne ka Jylla Meghalaya ka dei ka Jylla Khristan kam dei ka State Hindu ne RSS,” la ong u samla Lumlang.
Shuh shuh u la ong ruh ba ka HYC ka kyrpad ïa u DC ban pynbeit tang ha ka 2 tarik u Risaw kaba dei ka Sngi kha u Mahatma Gandhi, namar ki paidbah ka West ki sngew pyrshah ïa kane ka jingpynkhuid shnong ha ka Sngi U Blei, wat ki briew Sorkar ki diaw namar kumno yn trei ha ka Sngi U Blei.
U samla Lumlang u la ïathuh ruh ba ha ka jingïakynduh bad u DC, u la ong ba ka dei ka kam ka Sorkar India, kumta kat ka jingbthah hap bud hynrei kam pynbor ïano-ïano la ïa ki shnong ne paidbah, wat ïa ki nongtrei Sorkar.
Namar kata, halor kane ka bynta ka HYC ka kyntu ïa ki paidbah ba ym dei ban ïatreilang namar ka dei ka Sngi U Blei, ym ban pynpaw ïa ka burom ka Bharat, hynrei ban pynpaw ïa ka burom U Blei.
