Shillong, Nailur 29
Ka jingot khajna ka sorkar haba pynlong ïa ka ilekshon MDC na ka bhah jong ki mar poh khyndew, ki kali kiba dei ban leit sha ki district council kan ktah ïa ki ar tylli ki council kiba la duh tulop lypa namar kin sa nang duh tulop shuh lada shah ot biang ha kane ka ilekshon MDC ka ban wan.
Haba ïakren bad u Bah Pynïaid Sing Syiem uba dei CEM ka KHADC, u la ïathuh ba ha ka ilekshon MDC kaba la long ha u snem 2019, ka sorkar jylla ka la ot ïa ka khajna na ka bhah jong ka Council haduh phra klur hynrei um tip ba haduh katno klur ka sorkar jylla kan ot ïa ka ilekshon ka ban long ha u snem 2024 namar ki mar ki mata ruh ki la sdang rem.
U la ïathuh ba ki ar tylli ki council, kata ka GHADC bad JHADC kiba la duh tulop da ki bnai kin sa shah ktah shuh shuh namar ka sorkar jylla ka hap ban ot beit ïa ka bhah jong ki na ka khajna na ka jingmih u mar poh khyndew, ki kali bad kiwei de.
U la ong ba shisien ba ka sorkar kam ai ïa ka bhah na ki khajna kan ktah nyngkong ïa ka tulop jong ki nongtrei, hynrei u sngewkmen ba hadien ba u la shimti kum u CEM ka KHADC ka council kan dang shngaiñ namar kan lah ban siew tulop beit man u bnai ïa ki nongtrei.
Nalor kane, u Bah Pynïaid u la ong ba lada kheiñ ïa ka pisa haduh phra klur tyngka ka la lah ban pyndap tulop ïa ki nongtrei ka KHADC haduh ar bnai.
Kumta u don jingkyrmen ba lada ka sorkar India ka la mynjur ïa ka 6th schedule kan sa wanrah noh ïa ka jingkylla namar ïa ka ilekshon MDC yn pynïaid da kawei ka rukom.
Ha kajuh ka por u Bah Pynïaid u la ong haba shimti ban pynïaid ïa ka council hap trei shitom naduh ka bor met bad bor pyrkhat.
Nalor nangta u la ong biang kumba ki paidbah ki la jied, kum ki MDC ki hap ban peit ïa ka synshar-khadar ban shna aiñ ban wanrah ïa ka shong suk shong shngaiñ ha ka imlang ka sahlang.
Nalor kata, u la pynpaw biang ba wat la bun kiba kynthoh, hynrei kim sngewthuh ïa ka jingtreikam haba kim pat mad, pynban u sngewkmen hapdeng ka jingtrei baroh ki MDC ki don hapdeng ka met kaba shait ba khlaiñ bha.
