Shillong, Risaw 01
Ka Shillong Manipuri Students’ Union (SMSU) ha ryngkat ka jingïasnohktilang bad ka All Manipur Stu-dents’ Union (AM-SU) ha ka Sngi U Blei ka la pynlong ïa ka jingthang mombati ha Don Bosco Square, Laitumkhrah, Shillong ban pynrem halor ka jingshah pynïap jong ar ngut ki khynnah skul ha Manipur bad ban dawa na ki bor ba dei khmih na bynta ka suk ka “Kane ka dei kum shi bynta ban pyni ïa ka jingïatylli sha ka Jylla baieid jong ngi – ka Manipur kaba la mad ïa ka jingïakynad jaidbynriew naduh ka 3 tarik u Jymmang mynta u snem. Na ka liang ka SMSU, ngi kwah jingsuk bad ngi kwah ban phah ïa ka khubor jong ka jingïatylli sha baroh kiba ha Manipur,” la ong u Acting-President ka SMSU, u Ch. Thangamba Meetei haba kren bad ki nongthoh khubor.
U la ong ruh ba ka seng kam kwah ïa ka huri-hura ne ka thma hynrei ka jingthmu ba hakhmat eh jong ka, ka long ban kyrpad ïa ki bor ba dei khmih ban poi sha ka jingïapynbeit ha kaba ka jingsuk kan ïeng rasong.
“Ka seng ka kwah phah ïa ka khubor sha ka pyrthei baroh kawei, ka Thaiñ Shatei Lam Mihngi bad khamtam ïa ka Manipur ba ka jingsuk ka dei ban long ka banyngkong, bad kam dei ban don kano-kano ka huri-hura,” u la ong.
Halor ka jingbym kut shuh jong ka jingïakynad, u Meetei u la ong ba ki shu ïai ap bad kyrmen ba ka jingïakynad kan kut noh, watla kam pat i don dak ban poi sha kata ka bynta namar ka jingïasiat ka dang don, ki briew ki dang ïap, bad dang shen la sakhi ruh ïa ka jingshah pynïap jong ar ngut ki khynnah skul.
U la kyrpad ïa ka Sorkar Manipur, kumjuh ka Sorkar Pdeng ba kin wan lang, ïakren bad wad ka lad ka lynti ban pynbeit ïa kane ka jingeh ha ka jaka ban shah ïa kane ka thma ban bteng. “Ngim kwah ïohi snam shuh, ngi kwah ba ki lok ki jor, ki hynmen ki para jong ngi, kiba ieid ba thoiñ ba kin ïa im suk im saiñ,” la ong utei u nongïalam ka SMSU.
Haba pynsngew ba ka don ka jingktah watla ki sah shabar ka Manipur, u la ong ba wat lada kim lah ban ïarap markhmat, hynrei ki pyni ïa ka jingïatylli ba ki pyrshah jur ïa kane ka thma bad ki kyrmen skhem ba ka jingsuk kan wan noh mar-mar.
Haba kylli, u la ong, “Ngim lah ban kynnoh ïano-ïano hynrei kaei kaba jia, kawei ka jaidbynriew ka pyrshah ïa kawei pat…hooid ka dei hok ïa ki ban dawa…ka Sorkar ka dei ban sngap, ka dei ban wad ki lad ki lynti ha ka jaka ban shu ai lad ïa ka jingkulmar. Dei ban pynsangeh ïa kane, wad ka lad, kaei kaba dei ban leh, ïakren, pyrshang ban wad ïa ka lynti kaba biang tam na bynta baroh, ym tang na bynta kawei ka jaidbynriew, uwei u briew, kawei ka kynhun hynrei na bynta ka Manipur baroh kawei. Ka jingsuk ka long kaba donkam eh.”
Haba kdew ba ka jingïalum lang jong ki ha kane ka sngi ka long ban duwai ha ryngkat ka jingthang mombati na bynta kito kiba la khlad noh bad halor kaei kaba la jia ha katei ka Jylla, u la ong ba ka seng ka kwah ba ka suk ka saiñ bad ka hok ba kan ïeng rasong ha Manipur – ym na bynta kawei ka jaidbynriew, hynrei ka Jylla baroh kawei.
“Kane ka thma kam dei ban bteng shuh shakhmat, katto la biang…ka lah ban don kaei-kaei sha lyndet kaba ngim lah ban ïohi, pyrshang ban ïohi ïa kata, pyrshang wad bniah bad hangta ngin sa ïa im lang kum kawei,” u la ong. Shuh shuh u Meetei u la bynrap, “Ka thma kam wanrah eiei…tang ka jingjulor hynrei ka jingsuk ka wanrah ïa ka jingim kaba kmen.” Kum ban shu kdew hangne, ka jingïakynad jaidbynriew ha Manipur ka la jan kot sha ka 5 bnai kynthih naduh ba la sdang ha ka 3 tarik Jymmang mynta u snem.
