Khliehriat, Risaw 01
Ki pulit ka East Jaiñtia Hills ha ka Sngi Saitjaiñ ki la ïoh jingtip ba uwei u briew ïa uba la tip kyrteng kum u Altaf Hussain u la ïoh pdiang dang shen ïa ki mar kiba long be-aiñ, bad ïa kine, u la buh ha ka kudam jong u kaba don ha ka shnong Dkhiah.
Ha u kyrwoh khubor ba la phah ha ka Sngi U Blei, u Additional SP ka East Jaiñtia Hills, u Bah Banraplang Jyrwa, u la ïathuh ba hadien ba la ïoh ïa katei ka khubor, ki pulit ka Khliehriat bad na ka Anti Narcotics Task Force (ANTF), ki la thwet ïa u Hussain bad ki la ïoh bat ïa u.
Hadien kata, u Hussain u la ïalam ïa ki pulit sha ka kudam ka jong u bad na kata ka jaka la ïoh ban kurup haduh 9,883 tylli ki bilor dawai Phensedyl. Kane ka dei ka dawai jyrhoh bad la ju pyndonkam ïa ka kum u drok khamtam sha Bangladesh. Une briew u dei na ka shnong Badarpur, Karimganj ha Assam.
Shuh shuh u Bah Jyrwa u la ong da ka jingïalam jong u Hussain bad lyngba ka jingïarap jong ki pulit ka West Jaiñtia Hills, la ïoh kem sa ïa uwei pat u briew ïa uba la tip kyrteng kum u Ratan Dkhar, 56 snem ka rta, na Ummulong.
Ki pulit ki la ong ba u Ratan u la phla ïa ka jingdonkti jong u ha kaba u don ruh kawei ka karkhana hapoh khrum ïing bad ha kane ka jaka, u ju pyndonkam ban shna ïa ka dawai jyrhoh bad u ai kyrteng ïa kata ka dawai kum ka Phensedyl khnang ban ïoh die be-aiñ sha Bangladesh.
U Ratan u la ïalam ïa ki pulit sha ka ïing sah jong u bad sha kata ka karkhana bad la ïoh ban kurup ïa shibun bah ki dawai bad ki kor ki bor kiba u pyndonkam ban shna ïa kata ka dawai jyrhoh.
Ki pulit ki la ïoh ban kurup 600 bilor ka dawai jyrjoh Elocydyl (kawei kawei kaba don 100 ml), 10 tylli ki bilor jong ka dawai ba pynthiang kaba 500 ml kawei kawei, 11 tylli ki bilor jong ki jingbam khleh rong (1 kilo kawei kawei), 10 kilo ka Diphenhydramine Hydrochloride (ki jingkhleh na ka bynta ka Phensedyl), 1 kilo ka Chlorpheniramine Maleate (kawei pat ka jingkhleh na ka bynta ka Phensedyl), 7 tylli ki kot kiba ïadei bad ki kam khleh bad shna dawai, 34 tylli ki bilor Phensydyl (100 ml kawei kawei), 780 ki bilor Phynsedyl thylli ba 100 ml, 46 synduk ki dawai Phynsedyl ba la dep ban song, kawei ka synduk ki jingtap bilor, kawei ka song ban tah ïa ka kyrteng ka Phensydul, kawei ka Bottling Machine, bad artylli kiwei pat ki kor ban pynkhreh ïa ki dawai bad ka pisa T. 11,791.
Nalorkata, u Ratan u la phla ba u don sa arngut kiwei pat ki nongïarap jong u kiba shong ba sah ha Assam. Na ka liang ki pulit ki la ïoh kem ruh sa ïa uwei pat u paralok bad nongïarap jong u Hussain ïa uba la tip kyrteng kum u Shahin uba na ka shnong Lathimara, Katigorah, Assam. Une u Rahman u ju ïarap ban pynpoi ïa kitei ki dawai sha Assam.
Na ka liang ki pulit ki la kurup lut ïa baroh kitei ki dawai bad kiwei hapoh ki kyndon jong ka aiñ NDPS Act bad ka jingtohkit ka dang ïaid ban ïoh kem sa ïa kiwei kiba donkti, la ong u Additional SP.
