Shillong, Risaw 03
Ka Sorkar Jylla ka la ïathuh ha Ïingbishar (Meghalaya High Court) ba ka lynti ka dang don ban ïakren pynbeit haba ïadei bad ka mat ban pynkynriah ïa kiba sah ha Them Metor sha kawei pat ka jaka.
Kane ka la paw ha ka jingbatai ka Ïingbishar kaba la ong ba wat la ka don ka hukum kaba pynmih ha ka 29 tarik Nailur, 2023, hynrei ka Sorkar Jylla ka ong ba ka lad ka dang don ban ïakren pynbeit bad ki mamla kiba donbynta ban pynbeit ki dei ban kham ïoh ka por.
Ka Ïingbishar ka la ong ba namar ka don kum kata ka jingpynpaw, la kyrpad ba dei ban pynbeit noh shisyndon namarba kane ka mat ka la shu sahteng la bun phew snem.
Ka Ïingbishar ka la ong ruh ba ka Sorkar Jylla ka dei ban pyni kaiphod kaba pyni ïa ka jingïaid shaphrang ka kam ynda la don biang ka jingshim bishar ha kine ki hynriew taïew ban wan, kata ha ka 8 tarik Naiwieng.
La bthah ruh ba dei ban shim ki lad ban pyntikna ba yn lah ban pyndep noh ïa kane ka mat mynta u snem.
Dang shen ka Sorkar Jylla ka la mynjur ban kham pynheh ïa ka jaka ban pynsah ïa kiba sah ha Them Metor ynda la kynriah sha kawei pat ka jaka.
Ka Sorkar ka la ïathuh ïa kane hakhmat ka Ïingbishar (Meghalaya High Court) ha ka por ba shim bishar ïa ki mukotduma kiba la mudui da ka Sorkar Jylla bad ka Harijan Panchayat Committee (HPC) ha ka 29 tarik Nailur, 2023.
Kum ban pynkynmaw, ka Sorkar Jylla kham mynshwa ka la dep pyni ïa ka jingbatai bniah haba ïadei bad ka jingpynkynriah ïa 342 tylli ki longïing kiba sah ha Them Metor sha ka jaka jong ka Shillong Municipal Board.
