Shillong, Nailur 03
Kum shibynta ka jingai mynsiem bad ka jingpynshlur ïa ki samla pule kiba la leh bha ha ki eksamin bapher bapher kiba shong ba sah hapoh u pud u sam jong ka Dorbar Shnong Mawkhar, ka Seng Kynthei Mawkhar Welfare Organisation ha ka 2 tarik u Risaw, 2023 ka la pynlong ïa ka prokram pynkup burom ïa ki khynnah bad samla kaba la pynlong hapoh ka Khasi National Dorbar Hall, Mawkhar.
Ha katei ka sngi ka kongsan ka dei ka Kong Meribamon Lyngwa kaba dei ka District School Education Officer.
Haba ai jingkren ha katei ka sngi, ka Kong Meribamon Lyngwa, ka la ai khublei ïa ka Seng Kynthei Mawkhar kaba la khot sngewbha ïa ka ba kan long kum ka kongsan ha katei ka sngi bad ka la ong ba ka ju tip ba ka dong Mawkhar ka long ka dong kaba ïaid bha shakhmat.
Ka Kong Lyngwa ka la ai ka jingïaroh ruh ïa kitei ki nongshah pynkupburom ha katei ka sngi ha kaba ka la ong ba ka long ka jingïakhun kaba tyngeh ban ïoh 75% shajrong bad ka la mynsiem ruh ïa kitei ki samla ba kin ym kut tang hangtei hynrei ba ka jingïaid lynti ka jong ki ka dang dei kaba jrong.
Shuh shuh ka Kong Lyngwa ka la ai mynsiem bad pynshlur ïa kitei ki nongshah pynkup burom baroh ba kin dang ïai kiew shaphrang ha ka jingim bad ha ka thong ka jong ki.
Ha katei ka sngi la ïoh ïa ka jingpdiang sngewbha na ka Kong S.N. War, President ka Seng Kynthei Mawkhar Welfare Organisation, ka jingkren na u Bah Arwan. S. Tariang, Rangbah Shnong ka Mawkhar bad ka jingai khublei na ka Kong H.D. Lymba, Secretary ka Seng Kynthei Mawkhar Welfare Organisation
Shuh shuh ha katei ka sngi la ïoh ruh ïa ka sur jingpynbyrngia na ka Seng Kynthei Mawkhar Welfare Organisation bad kiwei kiwei.
Ki khynnah kiba la shah pynkup burom ha katei ka sngi ki dei kiba la ïoh ïa ka percentage kaba 75% shaneng kiba kynthup ïa kiba pass ïa ka klas 10, 12, ka Post- Graduate bad kiba la ïoh ïa ka National Award.
Ki khynnah kiba pas ïa ka klas 10 bad ïoh ïa ka 75% mynta u snem napoh ka shnong Mawkhar ki kynthup ïa ka Wandikmen Khongkai na Pine Mount School kaba la ïoh 86%, ka Ibanmerihun Syiem na Christian Academy Higher Secondary School kaba la ïoh 84.83%, ka Jessica Neil Kharchandy na B.K Bajoria kaba la ïoh 81%, ka Elbarisa N Najiar na Synod Higher Secondary School kaba la ïoh 78%, u Armang Dame Kupar Sohliya na Army Public School u ba la ïoh 76% bad ka Ekideilang Najiar kaba pas ïa ka klas 12 na Loreto Convent School kaba la ïoh 93%.
Katba kiba la pass ïa ka Post Graduate baf ïoh 75% shaneng ki don arngut kiba kynthup ïa ka samla Daphisha Thangkhiew kaba la pas ïa ka MSc Nutrition and Dietics na Martin Luther Christian University kaba la ïoh 93.75% bad ka samla Cheryl Linda Ryntathiang kaba la pas ïa ka MSc Psychology Specialize in Counselling na Assam Don Bosco University, Tapesia Garden Sonapur kaba la ïoh 78%.
Ki don 2 ngut kiba la shah pynkup burom ha katei ka sngi kiba dei ki nongïoh ïa ka khusnam National Award kiba kynthup ïa u Bah Timothy Jones Dhar, National Teacher’s Award 2023 bad u ba la ïoh ïa katei ka National Award na u Ministry of Skill Development and Entrepreneurship ka sorkar pdeng bad ka Kong Eldora B. Lyngdoh kaba la ïoh ïa ka khusnam Independence Day Virtual Art Exhibition 2023 ba la pynlong da ka Universe’s of Art, Panipat, Haryana bad ïa ka Dr. Careen E.G. Marbaniang kaba la ïoh ïa ka District Award halor ka jingtrei shitom bad ka jingshakri jong ka na ka bynta ka pule ka puthi hapoh ka jylla.
Nalor kine ka Seng Kynthei Mawkhar kaba don ïa ka Lasara Play School kaba dei ka jaka kaba peit ïa ki khyllung ha ka por ba ki kmie ki kpa ki leit trei leit ktah, ka la pynkup burom ruh ïa kawei nonghikai jong katei ka jaka, ka Kong Ibadahunshisha Lymba bad ka nongïarap jong katei ka jaka, ka Kong Homely Lymba bad kumjuh ïa ki arngut kiba ju ïarap ïa ka Seng Kynthei Mawkhar kiba kynthup ïa u Bah Kyrshan Kharnaïor bad u Bah Aemon Nongrum ha ryngkat ka jingdon lang ki dhot ka Dorbar Shnong bad ki bahaïing bahasem jong kiba shah pynkup burom.
