Shillong, Risaw 04
Ka nongïalam ka National People’s Party (NPP) kaba dei ruh ka Myntri ka Sorkar Jylla, ka Kong Ampareen Lyngdoh, ka la ong ba ka mat ban pynrung ïa ka ktien Khasi hapoh ka Khyrnit Baphra ka Riti Synshar ka dei ban long kaba kongsan bad ka kyntu ïa baroh ki seng saiñ pyrthei ban buh ïa kane ka mat ha ka ilekshon sha Ïingdorbar Lok Sabha ka ban sa long ha u snem 2024.
“Nga sngew dei ban kyrpad ba ka mat kaba ïadei bad ka ktien Khasi ka dei ban rung kum ka mat kaba kongsan tam ha kane ka ilekshon sha Ïingdorbar Lok Sabha kan sa long ha u snem ban wan,” la pynpaw ka Kong Ampareen.
Ka Kong Ampareen ka la pynkynmaw ruh ba hapoh ka jinglong Myntri Rangbah u Conrad K Sangma, la mynjur ïa ka rai ban kyntu lyngba ka Ïingdorbar ban ïoh jingithuh noh ka ktien Khasi kaba dang sahteng haduh mynta.
Ka Kong Ampareen ka dei kawei na kiba la ïashimbynta lang ha Delhi ban pynsngew lang ïa ka jingdawa ban ithuh noh ïa ka ktien Khasi ha ka jingïalang kaba la long ha Jantar Mantar, New Delhi ha ka 30 tarik Nailur.
Ka Kong Ampareen ka la ong ba ka ktien Khasi ka dei napdeng ki 38 tylli ki jait ktien jong ki jaitbynriew kaba dang ap ban ïoh jingithuh da kaba pynrung ha ka Khyrnit Baphra jong ka Riti Synshar, bad ka Sorkar India kam dei ban leh kiar na kane ka mat.
“Ki seng saiñ pyrthei ki dei ban kyrshan ban ïoh jingithuh noh ka ktien Khasi kaba la don lypa ha ka thup kaba la biang nadong shadong. Ngi donkam ban kyrshan, bad baroh ki seng saiñ pyrthei ki dei ban kyrshan lang. Ngi dei ka Jylla kaba rit kaba don tang 2 ngut ki MP ha Ïingdorbar Lok Sabha bad kam long kaba suk lada ym ïoh jingkyrshan khamtam haba don ki Jylla kiba heh kiba kham don bun ngut ki MP,” la pynpaw ka Kong Ampareen.
Kumta ka la ong ba ka long kaba donkam ban tynruh bad ka ktien Khasi ka don ha ka bynta kaba kham kyrmen ban ïoh jingithuh bad ka Sorkar Pdeng ruh kam da donkam shuh ban phah biang ïa ki kot ki sla ban pan jingtip shuh shuh bad ki jingbatai na ka Jylla haba ïadei bad ka ktien Khasi.
